مہلوکین کے ورثاء کو 4۔4 لاکھ روپے معاوضہ دینے کا اعلان
رانچی:جھارکھنڈ میں گزشتہ دو دنوں سے تیز ہوائیں کے ساتھ موسلادھار بارش بھی ہو رہی ہے جس کے نتیجہ میں ریاست کے مختلف علاقوں میں بجلی گرنے سے دو دنوں میں 12 لوگوں کی جان چلی گئی ہے۔ دھنباد ضلع کے برودا علاقہ میں بجلی گرنے سے ایک خاتون اور اس کی بیٹی ہلاک ہو گئی، جبکہ جمشید پور کے باہراگورا علاقہ اور گملا ضلع کے چیرودیہہ علاقے میں بھی بجلی گرنے سے 2 افراد کی موت ہو گئی۔ ان ہلاکتوں کے بعد جھارکھنڈ حکومت نے مہلوکین کے ورثاء کیلئے 4۔4 لاکھ روپے بطور معاوضہ دینے کا اعلان کیا ہے۔میڈیا رپورٹس کے مطابق جھارکھنڈ کے لوہردگا میں ایک شخص کی بجلی گرنے سے جمعہ کے روز موت ہو گئی۔ جمعرات کو بھی الگ الگ واقعات میں 7 لوگوں کی موت ہو گئی تھی۔ علاوہ ازیں پلاموں کے حسین آباد میں 2 لوگوں کی موت بھی بجلی گرنے کی وجہ سے ہوئی۔ کئی مقامات پر درخت اور بجلی کے کھمبے اکھڑ گئے ہیں۔ رانچی موسمیاتی محکمہ کے افسر نے بتایا کہ شمالی بہار و شمالی اڈیشہ سے اور ہریانہ سے سکم کے درمیان دو طرف سے لائنوں کے گزرنے سے جھارکھنڈ میں بجلی کڑکنے کا واقعہ پیش آیا۔ ہفتہ کے روز موسم میں بہتری دیکھنے کو ملی ہے اور بارش میں کمی ہو رہی ہے۔
