حیدرآباد۔/30 جون، (سیاست نیوز) میاں بیوی کے درمیان بچوں کو اسکول چھوڑنے کے بارے میں جھگڑے کے نتیجہ میں خاتون نے کیڑے مار دوا پی کر خودکشی کرلی۔ یہ واقعہ رین بازار پولیس اسٹیشن حدود میں پیش آیا۔ پولیس کے بموجب 27 سالہ عرفانہ بیگم جو محمد اقبال ساکن یاقوت پورہ کی بیوی تھی اور ان کی شادی 10سال قبل ہوئی تھی اور انہیں دو بچے بھی ہیں۔ حسب معمول شوہر بچوں کو اسکول چھوڑا کرتا تھا لیکن کسی ضروری کام کے سلسلہ میں کل اسکول نہ چھوڑ سکا اور بیوی کو یہ ذمہ داری دی تھی لیکن بیوی بھی بچوں کو اسکول چھوڑنے سے قاصر رہی۔ شام کو گھر واپس لوٹنے کے بعد اقبال نے اپنی بیوی سے بچوں کو اسکول نہ چھوڑنے کا سبب دریافت کیا اور جس پر دونوں کے درمیان بحث ہوئی اور عرفانہ بیگم نے کیڑے مار دوا پی لی اور دواخانہ منتقلی کے دوران فوت ہوگئی۔ پولیس رین بازار نے ایک مقدمہ درج کرلیا ہے۔