مرکزی وزیر اقلیتی بہبود مختار عباس نقوی کا ممبئی حج کمیٹی کے عہدیداروں کیساتھ اجلاس
ممبئی: عازمین حج 2021 ء کیلئے خوشخبری سناتے ہوئے مرکزی وزیر برائے اقلیتی امور مختار عباس نقوی نے کہا کہ حج کمیٹی ، دیگر ہندوستانی ایجنسیوں کے ساتھ اکتوبر، نومبر تک حج 2021 ء کی درخواست کا عمل اور دیگر تیاریاں شروع کردیں گی۔انہوں نے اس توقع کا اظہار کیا کہ سعودی حکومت جلد ہی حج 2021 ء کے حوالے سے ضروری رہنما اصول جاری کرے گی۔ ہندوستانی ایجنسیاں اس سلسلے میں سعودی حکام کے ساتھ رابطے میں ہیں” ۔آج ممبئی کے حج ہاؤس میں حج 2021 کے حوالے سے تیاری کا اجلاس منعقد ہوا۔ جس میں حج کمیٹی آف انڈیا کے سی ای او ایم اے خان اور دیگر اعلی عہدیدار موجود تھے ۔اس موقع پر نقوی نے کہا کہ پچھلے 3 سال کے دوران حجاج کرام کی تقریبا ً51 514 کروڑ روپے کی زائد رقم بھی واپس کردی گئی ہے ۔انھوں نے بتایاکہ کورونا وبائی مرض کی وجہ سے حج 2020 ء کی منسوخی کے بعد 2100 کروڑ روپئے بغیر کسی کٹوتی کے ، 1 لاکھ 23 ہزار افراد کو واپس کردیئے گئے ہیں۔ سعودی حکومت نے حج 2018-19کے دوران نقل و حمل کے سلسلے میں تقریبا 100 کروڑ روپے واپس کردیئے ہیں ۔انہوں نے مزید بتایا کہ حج 2021 کی تیاری شروع ہوئی ہیں۔اور ہم نے اس کے بارے میں غیر رسمی جائزہ اجلاس منعقد کیا ہے۔ ہم نے تبادلہ خیال کیا کہ حج کو2021 کو وبائی مرض کے درمیان کیسے کیا جائے گا نیز اس سلسلے میں ہم نے سعودی عرب سے بھی بات کی ہے۔