جدہ۔اسلامی تعاون تنظیم (او آئی سی) نے حجاج کے درمیان سماجی فاصلہ قائم رکھنے کا چیلنج پورا کرنے پرسعودی عرب کو مبارک باد پیش کی ہے۔مقامی میڈیا کے مطابق او ا?ئی سی کے سیکرٹری جنرل ڈاکٹر یوسف العثیمین نے کہا کہ سعودی عرب میں شاہ سلمان اور ولی عہد کی قیادت میں کامیاب حج کی شاندار حکمت عملی تیار کی گئی۔سیکرٹری جنرل نے کہا ہے کہ سعودی قیادت نیمحدود تعداد میں حج کروانے کا فیصلہ کرکے ثابت کردیا کہ سعودی عرب ہر طرح کے حالات میں بہترین حج انتظامات کی صلاحیت رکھتا ہے۔ انہوں نے کہا کہ سعودی حکومت نے انسانی جانوں کے تحفظ سے متعلق اسلامی شریعت کے مقاصد کی تکمیل کی اور حج کے دوران سماجی فاصلے کی جو حکمت عملی تیار کی تھی اسے احسن طریقے سے نافذ کیا۔ ڈاکٹر یوسف العثیمین نے مزید کہا کہ مملکت نے اس سال غیرمعمولی حج موسم میں ایک طرف تو حاجیوں کو شاندار حج خدمات مہیا کیں اور دوسری طرف حج اجتماع کو نئے کورونا وائرس سے بچانے کے لیے بہترین حفاظتی صحت اقدامات کیے ہیں۔