ریاض ۔ وزارت داخلہ کے ترجمان نے کہا ہے کہ حج کے دوران منی، مزدلفہ اورعرفات کے اطراف سیکیورٹی حصار قائم ہے اور یہ حصار حج کے اختتام تک جاری رہے گا۔ کسی کو بھی غیر قانونی طریقے سے ان مقامات پر جانے نہیں دیا جائے گا۔ ویب سائٹ کے مطابق وزارت داخلہ کے ترجمان نے حج کی تازہ صورتحال پر تفصیلات فراہم کرتے ہوئے کہا کہ نئے کورونا وائرس سے بچاؤ کے لئے مقررہ حفاظتی تدابیر کی پابندی سب پر لازم ہے۔ کوئی بھی اس سے مستثنی نہیں۔ ترجمان نے کہا کہ سیکیورٹی فورس کے ادارے ایسے کسی بھی شخص کو جس کے پاس حج اجازت نامہ نہیں ہوگا اسے مقدس مقامات پر داخل ہونے سے روکیں گے۔دریں اثنا سعودی خبر رساں ایجنسی ایس پی اے نے سیکیورٹی فورس کے ترجمان کے حوالے سے کہا کہ حج مقامات پر بغیر اجازت غیر قانونی طریقے سے حج مقامات میں داخلے کی کوشش کرنے والے244 افراد کو گرفتار کیا گیا ہے۔ترجمان نے شہریوں اورمقیم غیرملکیوں پر زورد یا کہ وہ بغیر اجازت نامے کے حج مقامات میں داخل ہونے کی کوشش سے گریز کریں۔وازارت داخلہ کی جانب سے گزشتہ ماہ سے لوگوں کو خبردار کیا جا رہا تھا کہ پرمٹ کے بغیر مشاعر مقدسہ جانے پر دس ہزارریال جرمانہ عائد کیا جائے گا۔