حج کے مسائل سے آگاہی کیلئے جستجو کریں، عازمین کے ٹیکہ اندازی کیمپ سے علماء کا خطاب
کاماریڈی ۔ 26 مئی ( سیاست ڈسٹرکٹ نیوز) اسلام یہ چاہتا ہے کہ مومن اپنی زندگی سنوار لے، اور گناہوں کو چھوڑ کر پاکیزہ زندگی گزارنے کا داعیہ اس میں پیدا ہو، اپنے آپ کو اپنی روح اور جسم کو بھی اسی فطرت سلیم کے سانچے میں ڈھا ل لے، رسول عربیﷺ نے ارشاد فرمایا: ’’جس نے خالص اللہ کی رضا کیلئے حج کیا اور اس دوران کوئی گناہ نہیں کیا تو وہ گناہوں سے ایسا پاک وصاف ہو کر لوٹے گا جیسے اپنی پیدائش کے دن گناہوں سے پاک صاف تھا، ایسے ہی کامل و مکمل حج کو تاجدار انبیاء خاتم النبیینﷺ نے حج مبرور قرار دیا، حج کے مقدس سفر سے ہم اپنی زندگی میں تبدیلی لائیں، کیونکہ حج زندگی میں تبدیلی لانے کا بہترین ذریعہ ہے، حج زندگی میں ایک بار فرض ہے، جب آپ اپنی ز ندگی کی گاڑھی کمائی خرچ کرکے حج پر جارہے ہیں تو حج کے مسائل بھی خوب لگن سے سیکھ کر جائیں، حج مقبول ومبرور کی سعادت حاصل کرنے کیلئے ابھی سے تیاری فرمائیں، جسمانی و روحانی اعتبار سے اپنے آپ کو تیار کریں، مسائل حج علماء کرام سے سیکھ کر جائیں، ان خیالات کا اظہار ضلع حج سوسائٹی کاماریڈی کے زیراہتمام منعقدہ تربیتی و ہیلتھ چیک اپ وٹیکہ اندازی کیمپ سے صدر ضلع حج سوسائٹی کاماریڈی حافظ محمد فہیم الدین منیری نے کیا۔ ٹیکہ اندازی کی اہمیت اور حج کمیٹی آف انڈیا کے تحت حج کرنے کی سہولیات کو واضح کیا، میڈیکل عملہ کے علاوہ نوجوانان نے عازمین حج کی خدمت میں بھرپور حصہ لیا، اسی طرح شہ نشین پر مولانا مفتی عمران خان قاسمی ، مولانا عبدالرقیب، مولانا منظور مظاہری، مولانا نظرالحق قاسمی کے علاوہ علماء حفاظ کرام وذمہ داران کی کثیر تعداد موجود تھی۔ ٹیکہ اندازی کیمپ کا کامیاب انعقاد عمل میں آیا، ضلع کاماریڈی کے محکمہ صحت سے وابستہ آفیسرس کے تعاون سے سرکاری ڈاکٹروں نے مع عملہ سرکاری دواخانہ نہایت ہی خلوص کے ساتھ عازمین وعازمات حج کی ٹیکہ اندازی کے علاوہ چیک اپ کا کام کیا، ہم تمام ہی کے ممنون و مشکور ہیں، مرزا حفیظ بیگ رکن ضلع حج سوسائٹی کاماریڈی و بلدیہ نے اس ٹیکہ اندازی کیمپ کی مکمل نگرانی کی، نیز مدعوئین خصوصی کی حیثیت سے محمد امجد کونسلر، محمد لڈو کونسلر، محمد یوسف کنٹراکٹر، محمد ماجد اللہ ، محمد عبدالواجد محمد عبدالماجد انجینئر حیدرآباد نے شرکت کی۔ مفتی محمد خواجہ شریف مظاہری نے نظامت کے فرائض انجام دے اور نماز ظہر کی امامت فرمائی۔