نئی دہلی: حج 2023 کی تیاریاں پرزور طریقے سے جاری ہیں، جس کے تحت ایک طرف جہاں عازمین حج کی سہولت کے لئے اسٹیٹ بنک آف انڈیا (ایس بی آئی) کے فوریکس کارڈ کا پہلی بار انتظام کیا جارہا ہے، وہیں دوسری طرف ان کیلئے لازمی انشورنس اسکیم کا بھی انتظام کیا جارہا ہے مرکزی وزیر برائے اقلیتی امور سمرتی ایرانی نے آج یہاں ان خیالات کا اظہار کرتے ہوئے کہا کہ مرکزی حکومت اب اسٹیٹ بنک آف انڈیا کے تعاون سے عازمین کے لئے فوریکس کارڈ کا انتظام کر رہی ہے ،جس کے ذریعے وہ بغیر نقد رقم کے ہی سفر حج پر جاسکیں گے ۔ انہوں نے کہا کہ پہلے سفر حج کے لئے ناموں کا انتخاب ہونے پر ہر عازم حج کو روانگی سے کئی ماہ قبل حج کمیٹی کے پاس 2100 ریال کے بقدر رقم جمع کرانا پڑتا تھا جو انہیں امبارکیش پوائنٹ پر سفر حج پر روانگی کے وقت 2100 ریال کی شکل میں واپس ملتے تھے ۔ اور مکہ و مدینہ میں یہ پیسہ ختم ہوجانے پر عازمین کو بڑی مشکلات کا سامنا کرنا پڑتا تھا مگر اب اس کی ضرورت نہیں ہے ۔
