سری نگر : جموں و کشمیر پیپلز کانفرنس کے چیئرمین سجاد غنی لون نے پیپلز الائنس فار گپکار ڈیکلریشن (پی اے جی ڈی) کو حد بندی کمیشن کی سفارشات کو عدالت عظمیٰ میں چیلنج کرنے کے بیان پر ہدف تنقید بناتے ہوئے کہا کہ جموں و کشمیر حد بندی کمیشن کی رپورٹ قانونی طور پر نا قابل چیلنج ہے ۔انہوں نے کہا کہ پی اے جی ڈی سے جھوٹ بولنے سے احتراز کرے ۔موصوف چیئرمین نے ان باتوں کا اظہار بدھ کے روز اپنے سلسلہ وار ٹویٹس میں کیا۔انہوں نے یہ ٹویٹس پی اے جی ڈٰی کے اس بیان کہ اگر حد بندی کمیشن نے اپنی سفارشات میں تبدیلی نہیں کی تو وہ عدالت عظمیٰ میں انہیں چیلنج کریں گے ، کے رد عمل میں کیا۔انہوں نے کہا: ‘کوئی ان (پی اے جی ڈی) کو سمجھائے عدالت میں اس رپورٹ(حد بندی کمیشن کی سفارشات) کے خلاف چیلنج نہیں کیا جا سکتا ہے یہ قانونی طور پر نا قابل چیلنج ہے۔ ان کا ٹویٹ میں مزید کہنا تھا: خدا کے لئے جھوٹ بولنا بند کریں۔
