ریاض۔ (کے این واصف) : حرمین شریفین کے انتظامیہ کا R&D شعبہ زائیرین کو سہولتیں فراہم کرنے کی بابت مسلسل تحقیق مین لگا رہتا ہے۔ اس سلسلہ مین مصنوعی ذہانت (آرٹیفشل انٹیلی جنس)کے نیشنل سنٹر کے انجینئر نایف الحربی نے کہا ہے کہ حرمین شریفین میں اژدہام کو کنٹرول کرنے کے لیے مصنوعی ذہانت سے کام لیا جارہا ہے۔ اخبار 24 اور سیدتی کے مطابق الحربی نے کہا کہ ہی حکمت عملی 3 نکاتی ہے۔سب سے پہلے اس بات کا پتہ لگایا جاتا ہے کہ حرم شریف میں کسی خاص جگہ کتنے افراد موجود ہیں۔دوسرے اس بات پر زور دیا جاتا ہے کہ حرم شریف کے دروازوں سے کتنے افراد داخل ہوئے ہیں اور کتنے نکل چکے ہیں۔ تیسری بات یہ ہے کہ حرم شریف کے اندر موجود افراد کی ناپسندیدہ سرگرمیوں پر نظر رکھی جاتی ہے۔ مثلاً یہ کہ حرم شریف میں سگریٹ نوشی پر پابندی ہے۔ یہ پتہ لگایا جاتا ہے کہ آریا کوئی شخص سگریٹ پی رہا ہے۔ اسی طرح حرم شریف میں لڑائی جھگڑا ممنوع ہے۔ اس حوالے سے اس بات کا پتہ لگایا جاتا ہے کہ حرم شریف میں کہیں جھگڑا تو نہیں ہورہا ہے۔ان تینوں بنیادی باتوں کے تناظر میں کنٹرول روم کے عہدیدار اژدہام کو کنٹرول کرنے کے لیے ضروری اقدامات کرتے ہیں۔دوسری جانب امن عامہ کے ڈائریکٹر لیفٹیننٹ محمد البسامی نے کہا کہ حج و عمرہ سیکورٹی اسپیشل فورس اور سعودی اتھارٹی برائے ڈیٹا اور مصنوعی ذہانت (سدایا) مسجد الحرام اور مسجد نبوی شریف کے زائرین کو اڑدحام کے مسائل سے بچانے کے لیے مل جل کر حکمت عملی تیار کیے ہوئے ہیں۔ البسامی نے کہا کہ ہر سال مقدس شہروں میں زائرین کی تعداد بڑھ رہی ہے۔
