پیرس: فرانسیسی اخبار ’’لبریشن‘‘ نے اپنی ایک رپورٹ میں انکشاف کیا ہیکہ لبنانی حزب اللہ ملیشیا کے پاس خفیہ سرنگوں کا نیٹ ورک موجود ہے جو غزہ میں حماس کے مقابلے میں زیادہ ترقی یافتہ ہے۔ اخبار کے مطابق لبنانی ملیشیا کے پاس ایسی سرنگیں ہیں جو سینکڑوں کلومیٹر لمبی ہیں اور ان کی شاخیں ہیں جو اسرائیل اور شاید اس سے آگے شام تک پہنچتی ہیں۔اخبار نے اسرائیلی محققین اور ویب سائٹس کے حوالے سے کہا ہے کہ تحریک نے بیروت، بقاع اور جنوبی لبنان کو جوڑنے والے مقامی زیر زمین نیٹ ورکس سے منسلک درجنوں آپریشن سنٹرز کے ساتھ ایک دفاعی منصوبہ بنایا ہے۔ حزب اللہ اور اسرائیل کے درمیان مسلسل کشیدگی اور خطرات کے تحت تل ابیب میں شمالی سرحد پر حزب اللہ کی سرنگوں کی موجودگی کے بارے میں خوف پیدا ہو گیا ہے جن کے بارے میں خیال کیا جاتا ہیکہ شمالی اسرائیل کے ساحل پر واقع شہر نہاریا کے ایک ہاسپٹل تک پہنچتی ہیں۔ مہینوں پہلے، نہاریا میں میڈیکل سنٹر کی انتظامیہ کی طرف سے ڈرلنگ کے شور کے بارے میں موصول ہونے والی شکایات کے بعد، اسرائیلی فوج نے لبنان سے مذکورہ ہاسپٹل کی طرف جانے والی سرنگ کے وجود کے خدشے کو مسترد کرنے کیلئے زمینی ٹسٹ کرنے کا فیصلہ کیا۔اسرائیلی اخبار اسرائیل ہیوم نے انکشاف کیا ہے کہ ایک ماہ سے زائد عرصہ قبل اسرائیلی حکام نے جانچ کے مقصد کیلئے کھدائی کے 40 سے زائد آپریشن کیے لیکن ان ٹیسٹوں سے کچھ حاصل نہیں ہوا، اخبار کے مطابق ہاسپٹل کے علاقہ میں کام شروع ہونے کے بعد حفاظت کی خاطر کھدائی کا کام ترک کرنے کا فیصلہ کیا گیا۔اخبار نے نشاندہی کی کہ نہاریا میں واقع اس ہاسپٹل کو جغرافیائی طور پر لبنان کے ساتھ شمالی سرحد کے یعنی صرف 10 کلومیٹر کے فاصلے پر قریب ترین ہاسپٹل سمجھا جاتا ہے۔ مشتبہ سرنگوں کے معاملے کی ابتدائی اطلاعات گذشتہ سال دسمبر میں سامنے آئی تھیں۔اسرائیلی فوج نے پانچ سال قبل لبنانی حزب اللہ کی طرف سے اسرائیلی سرحدوں کے اندر کھودی گئی پانچ سرنگوں کی دریافت کا اعلان کیا تھا۔