ولاہور ۔7 اکٹوبر (سیاست ڈاٹ کام ) سری لنکا کے خلاف پہلے ٹی20 میچ میں محمد حسنین نے شاندار بولنگ کا مظاہرہ کرتے ہوئے ہیٹ ٹرک کا اعزاز حاصل کر لیا۔ لاہور کے قذافی اسٹیڈیم میں کھیلے گئے مقابلے کے ابتدائی اوورز میں محمد حسنین کے لیے زیادہ اچھے ثابت نہ ہوئے اور وہ نسبتاً مہنگے ثابت ہوئے۔ تاہم فاسٹ بولر نے میچ کے 16ویں اور اپنے تیسرے اوورکی آخری گیند پر بنوکا راجا پکسے کو آؤٹ کر کے اپنی پہلی وکٹ حاصل کی۔19ویں اوور میں حسنین نے اپنے چوتھے اوورکی پہلی گیند پر 17 رنز بنانے والے سری لنکائی کپتان داسن شناکا اور شیہان جے سوریا کو آؤٹ کر کے اپنے کیریئر کی پہلی بین الاقوامی ہیٹ ٹرک انجام د ی جو نیا عالمی ریکارڈ ہے اور ٹی20 میں ہیٹ ٹرک کرنے والے سب سے کم عمر بولر بن گئے۔ ٹی20 کرکٹ میں اب تک 9 ہیٹ ٹرک ہیں جہاں پہلی ہیٹ ٹرک آسٹریلیائی فاسٹ بولر بریٹ لی نے لی۔ ٹی20میں سری لنکا کے لستھ ملنگا واحد کھلاڑی ہیں جنہوں نے دو بین الاقوامی ہیٹ ٹرک کیں جبکہ پاکستان کی جانب سے فہیم اشرف کے بعد حسنین ہیٹ ٹرک کرنے والے دوسرے بولر ہیں۔ محمد حسنین ناصرف پاکستان بلکہ ہیٹ ٹرک کرنے والے دنیا کے سب سے کم عمر بولر بن گئے، انہوں نے 19 سال اور 183دن کی عمر میں ہیٹ ٹرک کر کے یہ اعزاز حاصل کیا۔ بین الاقوامی کرکٹ میں مجموعی طور پر سب سے کم عمر میں ہیٹ ٹرک کرنے کا اعزاز بھی پاکستان کے عاقب جاوید کے پاس ہے جنہوں نے 1991 میں شارجہ کے مقام پر ہندوستان کے خلاف کھیلے گئے ونڈے میچ میں 19سال 81 دن کی عمر میں ہیٹ ٹرک مکمل کی تھی اور28سال گزرنے کے باوجود ان کا یہ ریکارڈ اب تک قائم ہے۔ اب ٹی20 کرکٹ میں سری لنکا کی جانب سے لستھ ملنگا اور تھسارا پریرا سمیت سب سے زیادہ تین ہیٹ ٹرک کی گئیں جبکہ پاکستان اور نیوزی لینڈ کی جانب سے فی کس دو اورآسٹریلیا اور افغانستان کی جانب سے فی کس ایک ہیٹ ٹرک کی گئی ہے۔
