نارائن پیٹ ۔ ریاست تلنگانہ و کرناٹک کی سرحد پر واقع ضلع نارائن پیٹ مستقر پر واقع درگاہ حضرت سید شاہ محمد تقی سبز پوش قادری کے عرس کی 4 روزہ سالانہ عرس تقاریب کا 15 نومبر بروز پیر کو جلوس پرچم قادریہ کا آغاز ہوگا۔ ان تقاریب میں ریاست تلنگانہ کے مختلف مقامات کے علاوہ پڑوسی ریاست کرناٹک’ آندھراپردیش’ مہاراشٹر اور گجرات’ ممبئی’ احمد آباد سے تعلق رکھنے والے ہزاروں افراد بلالحاظ مذہب و ملت شرکت کرتے ہیں جنھیں تمام تر بنیادی سہولیات پہنچانے کیلئے سجادہ نشین و انتظامی کمیٹی کی زیر نگرانی انتظامات کئے جارہے ہیں۔ پروگرام کے مطابق 15 نومبر بروز پیر کو بعد نماز عصر پٹیل ہاؤس روبرو جامع مسجد سے جلوس پرچم قادریہ برآمد ہوگا جو ٹاون کے مختلف شاہراہوں سے ہوتا ہوا قبل مغرب درگاہ تقی بابا پہنچے گا۔ بروز منگل 16 نومبر کو بعد نماز عشاء صندل کٹہ سے جلوس صندل برآمد ہوگا۔ جس میں ہزاروں کی تعداد میں مریدین و معتقدین کی کثیر تعداد شرکت کریں گی۔ اور نماز فجر سے قبل درگاہ شریف پر پہنچے گا۔ جہاں پر رسم صندل مالی سجادہ نشین درگاہ تقی بابا سید شاہ غیاث الدین قادری انجام دیں گے۔ بروز چہارشنبہ 17 نومبر کو چراغاں ہوں گے اور بعد نماز عشاء احاطہ درگاہ شریف میں جلسہ فیضان اولیاء منعقد ہوگا۔ 18 نومبر بروز جمعرات کو بعد نماز فجر محفل زیارت منعقد ہوگی۔ اس موقع پر مہمان عالم دین حضرت علامہ مولانا حافظ و قاری مفتی محمد ابوبکر ثقافی سربراہ اعلیٰ ادارہ اہل سنت المرکز الاسلامی ضلع باگلکوٹ کا خصوصی خطاب ہوگا۔بعد ازاں صلوٰۃو سلام و فاتحہ خوانی و تقسیم تبرکات عمل میں لائے جائیں گے۔ اسی روز بعد نماز عشاء محفل سماع منعقد ہوگی جس میں بادشاہ قادری قوال (ممبئی) اور اختر امجد علی قوال (جئے پور) نعتیہ و منقبتہ کلام سنائیں گے۔ رات دیر گئے سجادہ نشین مولانا سید شاہ غیاث الدین قادری کی دعا پر عرس تقاریب کا اختتام عمل میں ائے گا۔ تمام اجلاسوں کی نظامت حافظ چاند پاشاہ لکچر ر انجام دیں گے۔ انتظامی کمیٹی کے ذمہ داران الحاج نواز موسیٰ’ محمد رفیق چاند’’ و دیگر ذمہ داران نے عامتہ المسلمین سے شرکت کی گزارش کی ہے۔