عوامی نمائندوں کا کافی بہتر ردعمل
حیدرآباد 7 جون (یو این آئی) حفظان صحت کیلئے ہر اتوار دس بجے دس منٹ صفائی کی تلنگانہ کے وزیر بلدی نظم ونسق کے تارک راما راو کی مہم کے پانچویں ہفتہ کے دوران بھی کافی بہتر ردعمل دیکھاگیا۔اس مہم کا مقصدگھروں کے اطراف کی صفائی کے ذریعہ موسمی بیماریوں سے نجات ہے ۔تارک راما راونے ریاست کے شہری علاقوں میں موسمی امراض کی روک تھام کے لئے بروقت اقدام کے طورپر یہ مہم شروع کی تھی۔ آج بھی وزرا، کلکٹرس کے ساتھ ساتھ حکمران جماعت ٹی آرایس کے عوامی نمائندوں نے اس پروگرام میں سرگرمی سے حصہ لیا اور اپنے اس کام کی ویڈیوز و تصاویر کو وزیر تارک راما راو کو ٹوئیٹ کیا۔پداپلی ضلع کی کلکٹر،ریاستی وزرا پی اجئے کمار،وی سرینواس گوڑ،سی ملاریڈی،مئیر حیدرآباد بی رام موہن نے اس پروگرام میں سرگرمی کے ساتھ حصہ لیا۔وزیر پی اجئے کمار نے کھمم کارپوریشن کے 35ویں ڈیویثرن میں صفائی کا کام انجام دیا۔وزیر سرینواس گوڑ نے ٹورازم پلازہ حیدرآباد میں صفائی کی مہم انجام دی۔ مئیر حیدرآباد بی رام موہن نے حیدرآباد کے علاقہ مانصاحب ٹینک علاقہ میں واقع چاچانہرو پارک میں خصوصی صفائی اور سینی ٹیشن کی مہم انجام دیا۔ اس پروگرام کا مقصد پانی کے جمع ہونے کے تمام مقامات کی صفائی کے ذریعہ موسمی بخار کوروکنے کے لئے عوامی شراکت کو یقینی بنانا ہے ۔تارک راما راو نے تمام منتخبہ عوامی نمائندوں سے اپیل کی تھی کہ وہ اپنے متعلقہ مکانات میں صفائی کے کام انجام دیں اور غیرضروری جمع پانی کی نکاسی کا کام انجام دیں۔ان کی اس اپیل پر بڑے پیمانہ پر عوامی شخصیات نے ردعمل ظاہر کیا ہے ۔ تاکہ اس بات کو یقینی بنایاجاسکے کہ آنے والے موسم برسات کے دوران کسی بھی قسم کے موسمی امراض پھوٹ نہ پڑیں۔راو نے عوام پرزور دیا تھا کہ وہ اپنے گھروں کے غیر محفوظ مقامات پر جمع پانی کی نکاسی کا کام کریں۔یہ عمل ہر فرد ہر اتوار کو دس منٹ کے لئے دس ہفتوں تک کرے ۔
