نئی دہلی۔12 اکتوبر ۔( سیاست ڈاٹ کام ) وزیر داخلہ امیت شاہ نے آج کہا کہ حق اطلاعات قانون (آر ٹی آئی) کا اصل مقصد نظام میں عوام کا اعتماد برقرار رکھنا ہے اور یہ اس میں کامیاب رہا ہے ۔ شاہ نے یہاں مرکزی انفارمیشن کمیشن کے 14 ویں سالانہ کانفرنس سے خطاب کرتے ہوئے کہا کہ شفافیت اور جوابدہی یہ دونوں ایسے اعضا ہیں جس کی بنیاد پر ہی اچھی انتظامیہ اور گڈ گورننس دی جا سکتی ہے ۔ شفافیت اور احتساب دونوں کو آگے بڑھانے کیلئے آر ٹی آئی ایکٹ نے بڑی مدد کی ہے ۔انہوں نے کہا کہ ملک میں ضروری تھا کہ لوگوں کا اعتماد حکومت اور نظام میں قائم ہو اور لوگوں کی شرکت بھی نظام کے اندر آئے ۔ آزادی کے پہلے انتظامیہ کا مقصد اپنے آقاؤں کی خواہش کی تکمیل کرنا تھا، اس کی وجہ سے چویل عرصہ سے عوام اور انتظامیہ کے درمیان بڑی کھائی بن گئی تھی۔وزیر داخلہ نے کہاکہ میں مانتا ہوں کہ ہماری جمہوریت کے سفر میں آر ٹی آئی ایکٹ بہت بڑا سنگ میل اور ہماری مسلسل چلنے والی جمہوری سفر ایک میل کا پڑاؤ ہے۔
