تاحال28کے منجملہ 11نعشیں اسرائیل کو مل چکی ہیں
غزہ۔19؍اکتوبر ( ایجنسیز )عرب میڈیا کے مطابق اسرائیل نے تصدیق کی ہے کہ اسے حماس کی جانب سے 2 مزید یرغمالیوں کی نعشیں موصول ہوگئی ہیں۔وزیراعظم نیتن یاہوکے دفتر کی جانب سے جاری بیان میں کہا گیا کہ اسرائیل کو ریڈ کراس کے ذریعے 2 یرغمالیوں کی نعشیں موصول ہوئی ہیں، جنہیں غزہ میں اسرائیلی سکیورٹی فورسز کے حوالے کیا گیا ہے۔یہ نعشیں جنگ بندی معاہدہ کے تحت اسرائیل کے حوالے کی گئی ہیں۔بیان میں مزید بتایا گیا کہ نعشوںکو شناخت کیلئے اسرائیل میں ایک طبی تجزیاتی مرکز منتقل کیا جائے گا۔واضح رہے کہ اب تک حماس کی جانب سے 28 میں سے 11 مغویوں کی نعشیں اسرائیل کو ملی ہیں۔حماس کا کہنا ہیکہ رفح کراسنگ کی بندش یرغمالیوں کی نعشوں کی حوالگی میں تاخیر کا سبب بن رہی ہیں، یرغمالیوں کی نعشوں کی حوالگی رفح کراسنگ کھلنے سے مشروط ہے۔ دوسری جانب امریکی محکمہ خارجہ نے خدشہ ظاہر کیا ہے کہ حماس جنگ بندی کی خلاف ورزی کرسکتا ہے، حماس کی جانب سے جنگ بندی کی ممکنہ خلاف ورزی کی مستند اطلاعات ملی ہیں۔امریکی محکمہ خارجہ کا کہنا ہے کہ ضامن ممالک کو جنگ بندی کی ممکنہ خلاف ورزی سے متعلق آگاہ کر دیا گیا۔ اگر حماس نے ایسا کیا تو غزہ کے عوام کے تحفظ کے لیے اقدامات کیے جائیں گے۔جنگ بندی کی اسرائیل کی جانب سے خلاف ورزی کے باعث حماس کی جانب سے نعشوں کی حوالگی میں تاخیر ہونے کا خدشہ ظاہر کیا جارہا ہے جو باعث تشویش ہے ۔