غزہ : غزہ میں جنگ بندی اور یرغمالیوں کی رہائی کے لیے سفارتی کوششیں جاری ہیں، اس سلسلے میں مصر کے دارالحکومت قاہرہ میں مذاکرات جاری ہیں۔حماس میڈیا کے مطابق حماس کا وفد غزہ میں جنگ بندی کے لیے مذاکرات پر ثالثوں کے نتائج سننے کے لیے قاہرہ روانہ ہوا ہے۔حماس کی جانب سے کہا گیا ہے کہ حماس کے وفد کا قاہرہ روانہ ہونے کا مطلب مذاکرات میں شرکت نہیں۔حماس نے کہا ہے کہ امریکی صدر جو بائیڈن کے 2 جولائی کو پیش کردہ تجاویز پر عمل درآمد کے موقف پر قائم ہیں۔حماس کی جانب سے مطالبہ کیا گیا ہے کہ اسرائیل پر جنگ بندی معاہدہ پر عمل درآمد میں رکاوٹیں ڈالنے سے روکنے کے لیے دباؤ ڈالا جائے۔اس سے قبل ایک حماس رہنما کی جانب سے کہا گیا تھاکہ امریکہ کملا ہیرس کی صدارتی مہم کی حمایت کے لیے جنگ بندی مذاکرات کی کوششیں کر رہا ہے۔دوسری جانب وائٹ ہاؤس کے مطابق امریکی صدر جو بائیڈن نے مصری اور قطری قائدین سے ٹیلیفونک رابطہ کیا ہے۔وائٹ ہاؤس نے بتایا ہے کہ بائیڈن نے گفتگو کے دوران قاہرہ مذاکرات میں یرغمالیوں کی رہائی کی رکاوٹیں دور کرنے پر تبادلہ خیال کیا ہے۔واضح رہے کہ اس سے پہلے حماس نے رواں ہفتہ کے مذاکرات کی امریکی تجویز کو قبول نہیں کیا تھا۔
