غزہ، 29 اکتوبر (یو این آئی) اسرائیل کی جانب سے جنگ بندی معاہدہ کی مسلسل خلاف ورزیوں کے باعث فلسطینی مزاحمتی تنظیم حماس نے اسرائیلی مغویوں کی نعشوںکی حوالگی مؤخر کرنے کا اعلان کردیا۔ غیر ملکی ذرائع ابلاغ کے مطابق حماس کے عسکری ونگ القسام بریگیڈز نے خبردار کیا کہ اسرائیلی فوج کے مسلسل حملے یرغمالیوں کی نعشوںکی تلاش اور اس کی حوالگی کے عمل میں رکاوٹ کا سبب بن رہے ہیں۔ رپورٹس کے مطابق جنگ بندی معاہدے کے تحت حماس نے گزشتہ روز ایک اسرائیلی یرغمالی کی لاش حوالے کرنے کا اعلان کیا تھا تاہم معاہدہ کی شرائط کی خلاف ورزی کے بعد یہ عمل مؤخر کر دیا گیا۔ حماس نے اپنے بیان میں اسرائیلی جارحیت کو شرم الشیخ میں طے پانے والے جنگ بندی معاہدہ کی کھلی خلاف ورزی قرار دیدیا۔
