تل ابیب : فلسطینی مزاحمتی تنظیم حماس نے اسرائیلی دارالحکومت تل ابیب پر تازہ راکٹ حملے کیے ہیں۔ میڈیا کے مطابق حماس کے عسکری ونگ القسام برگیڈز نے اپنے بیان میں کہا ہے کہ صہیونیوں کے ہمارے شہریوں پر مظالم کیخلاف تل ابیب پر راکٹ حملے کیے ہیں۔راکٹ حملوں کے بعد اسرائیل نے تل ابیب میں کمرشل پروازیں معطل کردی ہیں۔اسرائیلی میڈیا کے مطابق دارالحکومت تل ابیب پر 6 ماہ بعد حماس کا یہ پہلا راکٹ حملہ ہے۔ تل ابیب کے علاقوں میں15دھماکے سنے گئے ہیں۔ میڈیاکا کہنا ہے کہ ان حملوں کے نتیجے میں تل ابیب میں کئی ماہ بعد راکٹ حملے کے سائرن سنے گئے۔ ان حملوں سے ثابت ہوتا ہے کہ غزہ میں 7 ماہ سے زائد عرصے سے جاری اسرائیل کے فضائی اور زمینی حملوں کے بعد بھی حماس تنظیم دور مار کرنے والے راکٹ داغنے کی صلاحیت رکھتی ہے۔
