یروشلم: اسرائیل فرار ہونے والے حماس تنظیم کے کمانڈر کے بارے میں نئی تفصیلات معلوم ہوئی ہیں۔ اس بات کا بھی انکشاف ہوا ہیکہ مذکورہ کمانڈر نے حماس کی قیادت کی نقل و حرکت، تنظیم کے راکٹوں کے ڈپوؤں، اس کے ارکان کی تربیت کے مقامات اور سیاسی و عسکری قیادت کی سکونت کے مقامات کے متعلق معلومات اِفشا کی ہیں۔ذرائع نے یہ بھی بتایا ہیکہ حماس تنظیم نے اپنے ایک کمانڈر کے اسرائیل فرار ہو جانے کے بعد تنظیم کے متعدد سیکورٹی ذمہ داران کو برطرف کر دیا ہے۔ علاوہ ازیں متعدد سیاسی رہنماؤں اور مسلح ونگ کے کمانڈروں نے اپنے قیام کے مقامات تبدیل کرلئے ہیں۔ذرائع نے واضح کیا کہ حماس کے سیاسی بیورو کے سربراہ اسماعیل ہنیہ نے مطالبہ کیا ہیکہ انہیں اس حوالے سے تحقیقات کے بعد جلد از جلد تمام امور سے آگاہ کیا جائے۔ میڈیا نے انکشاف کیا ہیکہ اسرائیلی خفیہ ایجنسی موساد کے عناصر نے حماس تنظیم کے ایک کمانڈر کو فرار کروایا۔ اس کارروائی کیلئے 72 گھنٹے پہلے سے تیاری کی گئی تھی۔
