صنعاء۔16جون (سیاست ڈاٹ کام) یمن میں ذرائع نے العربیہ اور الحدث نیوز چینلوں کو بتایا ہے کہ آئینی حکومت کو سپورٹ کرنے والے عرب اتحاد کے لڑاکا طیاروں نے النہدین اور جبل عطان کے علاوہ صنعاء کے جنوب اور مغرب میں کئی علاقوں میں حوثی ملیشیا کے عسکری ٹھکانوں، ہتھیاروں کے گوداموں اور بیلسٹک میزائل داغنے کے لانچنگ پیڈز کو فضائی حملوں کا نشانہ بنایا۔عینی شاہدین نے تصدیق کی ہیکہ آج صبح سویرے کئی دھماکے سنے گئے جنہوں نے دارالحکومت کو لرزا دیا۔ اس سے قبل بمباری کی کارروائی عمل میں آئی جس میں بنیادی توجہ حوثی ملیشیا کے عسکری کیمپوں اور ہتھیاروں کے خفیہ ڈپوؤں پر مرکوز رہی۔اس سے قبل عرب اتحاد نے پیر کو اعلان کیا تھا کہ اس نے حوثیوں کی جانب سے سعودی عرب کے صوبے عسیر کی جانب بھیجے گئے دھماکا خیز مواد سے بھرے ڈرون طیارے مار گرائے۔یاد رہیکہ حوثیوں کی جانب سے سعودی عرب کی شہری آبادی کو بار بار میزائل اور ڈرون حملوں کا نشانہ بنایا جا رہا ہے۔ یہ حملے بین الاقوامی قانون اور عالمی انسانی قانون کی کھلی خلاف ورزی ہیں۔عرب اتحاد اس سے قبل تصدیق کر چکا ہیکہ اب تک مملکت کی جانب بھیجے گئے جن ڈرون طیاروں کو مار گرایا گیا ان کی تعداد 357 ہے۔
