تمام خلیجی ممالک پرحملے کے مترادف : جی سی سی
ریاض ۔16جون (سیاست ڈاٹ کام) خلیج تعاون کونسل (جی سی سی) نے یمن کے ایرانی حمایت یافتہ حوثی باغیوں کے سعودی عرب کی شہری آبادی پر راکٹوں اور ڈرون طیاروں کے ذریعے کیے گئے حملوں کی شدید مذمت کرتے ہوئے خبردارکیا ہے کہ کونسل کے کسی ایک رکن پرحملہ تمام خلیجی ممالک پرحملہ سمجھا جائے گا۔العربیہ ڈاٹ نیٹ کے مطابق خلیج تعاون کونسل کی طرف سے گذشتہ روز جاری ایک بیان میں کہا گیا ہیکہ حوثی باغیوں کی طرف سے سعودی عرب پر ڈرون طیاروں کی مدد سے حملے کی کوشش قابل مذمت ہے۔ کونسل اس حملے میں سعودی عرب کے ساتھ کھڑی ہے۔خلیج تعاون کونسل کی ویب سائٹ نے بتایا ہے کہ کونسل کے سکریٹری جنرل سعودی عرب کے جنوبی علاقے خمیس مشیط پر حوثیوں کی طرف سے شہری آبادی پرحملہ کھلی دہشت گردی ہے۔ سعودی عرب کو اپنے دفاع اور بیرونی حملوں کی روک تھام کا حق حاصل ہے۔ اس حوالے سے کونسل سعودی عرب کیساتھ کھڑی ہے۔خیال رہے کہ سوموار کے روز عرب اتحادی فوج نے یمن سے سعودی عرب کے علاقے عسیر اور خمیس مشیط پر چھوڑے گئے ڈرون طیاروں کو مار گرایا تھا۔خلیج تعاون کونسل نے عالمی برادری سے مطالبہ کیا کہ وہ اپنی ذمہ داریوں کو نبھائیں اور خطے میں امن و سلامتی کو غیر مستحکم کرنے کی سازشوں کے خلاف خلیجی ممالک کا ساتھ دے۔
