صنعا، 22 جون (یواین آئی) یمن کی حوثی حکومت نے کہا ہے کہ وہ اپنی مسلح افواج کے اس اعلان کی حمایت کرتی ہے جس میں ایک روز قبل یہ کہا گیا تھا کہ اگر امریکہ نے ایران پر حملے کیے تو وہ بحیرئہ احمر میں امریکی بحری جہازوں کو نشانہ بنائیں گے ۔خبر رساں ادارے ’اے ایف پی ‘کے مطابق یمن کی حوثی حکومت نے بیان میں کہا ہے کہ ‘ہم یمن کی جانب سے مسلح افواج کے اُس اعلان کی توثیق کرتے ہیں جس میں کہا گیا تھا کہ وہ بحیرئہ احمر میں امریکی بحری جہازوں اور جنگی بیڑوں کو نشانہ بنانے کے لیے تیار ہیں’۔یہ بیان امریکہ کی جانب سے ایران پر حملے کے بعد جاری کیا گیا ہے ۔ایران کے نیم سرکاری خبر رساں ادارے تسنیم نیوز کے مطابق یمن کی انصار اللہ تحریک نے ایران پر امریکہکے حملے کو بزدلانہ جارحیت قرار دیتے ہوئے اس کی شدید مذمت کی ہے اور کہا ہے کہ یہ اقدام اسرائیلی مفادات کی تکمیل کے لیے کیا گیا ہے اور خطے و عالمی سلامتی کے لیے براہِ راست خطرہ ہے ۔اتوار کو جاری کردہ ایک بیان میں انصار اللہ کے سیاسی بیورو نے امریکہ کی جانب سے اسلامی جمہوریہ ایران اور اس کی نیوکلیئرتنصیبات پر ہونے والی سفاک اور بزدلانہ جارحیت کو سخت الفاظ میں مسترد کرتے ہوئے کہا کہ ایران پر امریکی حملہ تمام بین الاقوامی قوانین اور معاہدوں کی کھلی خلاف ورزی ہے ۔
