نئی دہلی: راجیہ سبھا نے ہندوستانی طریقہ علاج کی نشرو اشاعت کی یقین دہانی کے ساتھ ہومیوپیتھی سنٹرل کونسل (ترمیمی) 2020 بل اور انڈین میڈیکل سینٹرل کونسل (ترمیمی) بل 2020 کو آج صوتی ووٹ سے منظور کردیا۔صحت اور خاندانی بہبود کے مرکزی وزیر ہرش وردھن نے ان دونوں بلوں پر ایک ساتھ ہونے والی بحث کا جواب دیتے ہوئے کہا کہ حکومت ہندوستانی طریقہ علاج کو فروغ کے لئے پرعزم ہے ۔ انہوں نے کہا کہ وزیر اعظم نریندر مودی ذاتی سطح پر اسے عالمی سطح پر اس کو فروغ دینے میں مصروف ہیں اور پوری دنیا میں ہندوستانی طریقہ علاج کو مقبول بنانے کی کوشش کی جارہی ہے ۔انہوں نے کہا کہ قدرتی علاج معالجے اور یوگا کو بھی ترجیح دی جارہی ہے اور اس کے لئے الگ الگ آیوگ تشکیل دینے کی تیاری کی جارہی ہے ۔ اس پر کام جاری ہے ۔ انہوں نے کہا کہ وزارت آیوش کے بارے میں بہت سارے سوالات اٹھائے گئے ہیں۔ انہوں نے کہا کہ جس مقصد سے آیوش کی وزارت تشکیل دی گئی تھی وہ اپنے مقاصد کو پورا کرنے میں کامیاب رہی ہے ۔
