نئی دہلی، 22 اکتوبر (یو این آئی) عام آدمی پارٹی (عآپ) نے دہلی حکومت پر آلودگی کے اعداد و شمار کو غلط ثابت کرنے کا الزام لگاتے ہوئے اسے دہلی کے لوگوں کے ساتھ بے ایمانی قرار دیا ہے ۔ عام آدمی پارٹی کے دہلی ریاستی صدر سوربھ بھاردواج نے چہارشنبہ کو یہاں ایک پریس کانفرنس میں کہا کہ سرکاری سطح پر ڈیٹا کی چوری ایک سنگین معاملہ ہے ۔ انہوں نے سوال کیا کہ جیسے ہی دہلی میں آلودگی کی سطح بڑھنے لگی، سرکاری آلودگی کی نگرانی کرنے والے اسٹیشن خود بخود بند ہونے لگے ۔ صرف ایک نہیں بلکہ مختلف اداروں کے چار مانیٹرنگ اسٹیشن راتوں رات بند ہو گئے ۔ صبح جب ہوا تیز ہوئی تو ان اسٹیشنوں نے دوبارہ کام شروع کر دیا۔ یہ صریح بے ایمانی اور ڈیٹا چوری ہے ۔ انہوں نے کہا کہ حکومت دہلی کے لوگوں کو دھوکہ دے رہی ہے ۔ سانس کی بیماریوں اور دیگر بیماریوں میں مبتلا لوگوں کو بیوقوف بنایا جا رہا ہے اور بتایا جا رہا ہے کہ ہوا کے معیار کا انڈیکس کم ہے ۔ انہوں نے الزام لگایا کہ جب نہرو نگر اسٹیشن نے رات کے وقت ایئر کوالٹی انڈیکس (اے کیو آئی) ریڈنگ 1763 ریکارڈ کی تو اسٹیشن کو بند کردیا گیا۔ اخباری رپورٹس بتاتی ہیں کہ سرکاری ڈیٹا نے سری فورٹ میں اے کیو آئی300 سے 325 ظاہر کیا۔
جبکہ موبائل فون ایپس نے اے کیو آئی 1700 دکھایا۔ انہوں نے کہا کہ اوسط اے کیو آئی کو کم ظاہر کرنے کے لیے زیادہ ریڈنگ کو ہٹا دیا گیا۔ اگر حکومت نے ڈیٹا میں ہیرا پھیری کی ہے تو یہ فوجداری جرم اور سپریم کورٹ کی توہین ہے ۔
