کل جماعتی اجلاس کے بعدپرہلاد جوشی کا میڈیا سے خطاب
نئی دہلی: پارلیمانی امور کے وزیر پرہلاد جوشی نے کہا ہے کہ حکومت پارلیمنٹ کے سرمائی اجلاس میں قواعد کے تحت تمام مسائل پر بحث کے لیے تیار ہے اور امید ظاہر کی ہے کہ پارلیمنٹ میں اچھی بحث ہوگی۔ پرہلاد جوشی کی جانب سے طلب کردہ کل جماعتی اجلاس میں 31 پارٹیوں کے زائد از 42 قائدین نے شرکت کی۔ وزیر اعظم نریندر مودی نے اس میٹنگ میں شرکت نہیں کی۔ اس کے ساتھ ہی عام آدمی پارٹی نے درمیان میں اجلاس کا بائیکاٹ کر دیا۔ اجلاس کے بعد پرہلاد جوشی نے میڈیاکو بتایا کہ تمام پارٹیوں کے لیڈروں کی طرف سے بہت سی تجاویز پیش کی گئی ہیں۔ ہم نے اپوزیشن جماعتوں سے درخواست کی ہے کہ وہ پارلیمنٹ کو بغیر کسی رکاوٹ کے چلنے دیں۔ اجلاس سے وزیر اعظم کی غیر حاضری سے متعلق ایک سوال پر انہوں نے کہا کہ آل پارٹی میٹنگ میں آنے کی روایت پی ایم مودی نے شروع کی تھی، اس سے پہلے صرف پارلیمانی امور کے وزیر آتے تھے، آج وزیر اعظم نہیں آسکے۔ راجیہ سبھا میں قائد اپوزیشن ملکارجن کھرگے نے کہا کہ یہ اجلاس اقل ترین امدادی قیمت پر قانونی سازی اور مہلوک کسانوں کو معاوضہ کے سلسلے میں منعقد ہوا۔ انہوں نے کہا کہ ہمیں امید تھی کہ پی ایم مودی میٹنگ میں آئیں گے۔دوسری جانب عام آدمی پارٹی نے درمیان میں آل پارٹی میٹنگ کا بائیکاٹ کیا۔
پارٹی کے رکن پارلیمنٹ سنجے سنگھ نے کہا کہ حکومت کسی کو بولنے اور اپنے خیالات کا اظہار کرنے کی اجازت نہیں دیتی ہے۔ پارلیمنٹ کے اسی سیشن میں انہوں نے ایم ایس پی گارنٹی قانون بنانے کا مطالبہ کیا۔