نئی دہلی ۔ 24ستمبر ۔( سیاست ڈاٹ کام ) سپریم کورٹ نے ملک میں سوشل میڈیا کے غلط استعمال کو انتہائی خطرناک قرار دیتے ہوئے آج کہا کہ حکومت اس معاملے پر ترجیحی بنیاد پر غور کرے ۔جسٹس دیپک گپتانے کہا کہ سوشل میڈیا کا غلط استعمال روکنے کیلئے سخت گائیڈلائنس طے ہونے چاہئیں۔ ہماری پرائیویسی کی حفاظت ہونی چاہئے ۔عدالت نے حکومت سے اس معاملے پر تین ہفتہ کے اندر حلف نامہ داخل کرنے کیلئے کہا کہ وہ کب تک گائیڈلائنس تیار کرے گی۔جسٹس گپتا نے کہا کہ ہمیں اس کی سخت ضرورت ہے کہ آن لائن جرائم او رسوشل میڈیا پر گمراہ کن معلومات ڈالنے والے لوگوں کو ٹریک کیا جانا چاہئے ۔ ہم اسے یہ کہہ کریوں ہی نہیں چھوڑ سکتے کہ ہمارے پاس اسے روکنے کی تکنیک نہیں ہے ۔ اگر حکومت کے پاس اسے روکنے کی تکنیک ہے تو اسے روکے ۔عدالت عظمی نے کہا کہ حکومت طاقتور ہے ۔ اس کے پاس یہ سب روکنے کیلئے لامحدود اختیارات ہیں اور لوگوں کے پرائیویسی کے حقوق کی حفاظت کی جانی چاہئے۔ عدالت نے کہا کہ کسی کو بلا وجہ پریشان کرتے ہوئے سوشل میڈیا پر ٹرول کیوں کرے اور اسے اپنے کردار پر جھوٹے بیانات کے ذریعہ کیچڑ کیوں اچھالنے دیا جائے ۔
