ریٹائرمنٹ کے بعد سرکاری ملازمت نہیں ملے گی، کانگریس کے فوجی امور شعبہ کے سابق سربراہ کرنل روہت چودھری کی پریس کانفرنس
نئی دہلی، 28 اکتوبر (یو این آئی) کانگریس نے حکومت پر اگنی ویروں کے ساتھ دھوکہ کرنے کا الزام عائد کرتے ہوئے کہا ہے کہ پہلے یہ وعدہ کیا گیا تھا کہ ریٹائرمنٹ کے بعد انہیں سرکاری ملازمت فراہم کی جائے گی، لیکن اب وزارت داخلہ نے نوٹیفیکیشن جاری کرکے بتایا ہے کہ ریٹائر ہوئے اگنی ویروں کو ملک کی ٹاپ دس خانگی سکیورٹی ایجنسیوں میں رکھا جائے گا۔کانگریس کے سابق فوجی امور شعبہ کے سربراہ کرنل روہت چودھری نے منگل کو یہاں پارٹی ہیڈکوارٹر میں پریس کانفرنس میں اس نوٹیفیکیشن کو اگنی ویروں کے ساتھ دھوکہ قرار دیا اور کہا کہ یہ منصوبہ ملک کی سکیورٹی اور نوجوانوں کیلئے خطرناک ہے ، اس لیے اسے ختم کیا جانا چاہیے ۔انہوں نے کہا کہ حکومت ہمارے جوانوں کے ساتھ انصاف نہیں کر رہی۔ یہ واضح طور پر ملک کی سکیورٹی کے ساتھ کھلواڑ ہے ۔ کانگریس نے لوک سبھا انتخابات سے پہلے ہی ‘جے جوان مہم’ چلائی تھی اور اب ‘جے جوان مہم’ کا دوسرا مرحلہ جاری ہے ۔ کانگریس لیڈر راہول گاندھی مسلسل کہہ رہے ہیں کہ ملک کو کم تربیت یافتہ فوجی دیے جا رہے ہیں اور مودی حکومت فوجیوں کی پنشن کم کرکے اپنے سرمایہ دار دوستوں کے خزانے بھر رہی ہے ۔کرنل چودھری نے کہا ”ہم سب پرعزم ہیں کہ اگنی ویر منصوبہ ملک کی سکیورٹی اور نوجوانوں کیلئے مہلک ہے ، اسے ختم ہونا چاہیے ۔ مودی حکومت اگر آپریشن سندور میں اچھا کام کرنے والے فوجیوں کی حوصلہ افزائی نہیں کرسکتی تھی تو انہیں دھوکہ بھی نہیں دیا جانا چاہیے تھا۔ مودی حکومت نے وعدہ کیا تھا کہ ہم اگنی ویروں کو ریٹائرمنٹ کے بعد سرکاری نوکری دیں گے ، لیکن اب وزارتِ داخلہ نے نوٹیفیکیشن جاری کرکے بتایا ہے کہ ریٹائر ہونے والے اگنی ویروں کو ملک کی ٹاپ 10 نجی سکیورٹی ایجنسیوں میں رکھا جائے گا۔”انہوں نے طنزاً سوال کیا کہ مودی حکومت نے صرف 25 فیصد اگنی ویروں کو مستقل کیا ہے تو باقی واپس آ کر کیا بی جے پی دفاتر یا کسی کمپنی کے باہر دربان کی نوکری کریں گے ؟ کیا اگنی ویر اب اڈانی ڈیفنس کے اندر جائیں گے اور وہاں جاکر ایک نجی فوج کی طرح کام کریں گے ؟ حکومت نوٹیفیکیشن جاری کرکے کہتی ہے کہ اگنی ویروں کو سکیورٹی ایجنسیوں میں شامل کریں۔کانگریس کے سابق فوجی شعبے کے سربراہ نے کہا کہ ”ہماری حکومت سے سوال ہے کہ جب اگنی ویروں کو پنشن والی نوکری اور مرکز و ریاست کی ملازمتوں میں شمولیت کا وعدہ کیا گیا تھا تو آج انہیں نجی سکیورٹی ایجنسیوں میں کیوں بھیجا جا رہا ہے ؟ آئندہ برسوں میں واپس آنے والے اگنی ویروں کو پنشن والی نوکری کب اور کہاں دی جائے گی؟ ہم اگنی ویروں کو نجی فوج بنا کر ملک و بیرونِ ملک جنگوں میں جھونکنے نہیں دے سکتے ۔ ہماری ‘جے جوان مہم’ جاری ہے اور ہم فوجیوں کے مفاد میں سوالات اٹھاتے رہیں گے ۔