نئی دہلی9دسمبر(سیاست ڈاٹ کام )حکومت نے واضح کیا کہ ملک اور غیر ملکوں میں طلبہ کو اعلی تعلیم حاصل کرنے میں مدد کے لئے قرض مہیا کیا جارہا ہے اور اس سے اب تک لاکھوں طلبہ کو فائدہ پہنچا ہے لیکن اس قرض کو معاف کرنے کا اس کا کوئی منصوبہ نہیں ہے ۔وزیر مملکت برائے خزانہ انوراگ ٹھاکر نے پیر کو لوک سبھا میں ایک ضمنی سوال کے جواب میں بتایا کہ منصوبے کے تحت ملک میں تعلیم حاصل کرنے کے لئے طلبہ کو دس لاکھ روپے اور غیر ملکوں میں تعلیم حاصل کرنے کے لئے 20لاکھ روپے تک کا قرض دیا جاتا ہے ۔منصوبے کے تحت چار لاکھ روپے تک کے قرض کے لئے کوئی گارنٹی نہیں ہے جبکہ ساڑھے سات لاکھ روپے تک کے لئے قرض لینے کے لئے تھرڈ پارٹ کی گارنٹی کا التزام ہے ۔انہوں نے کہاکہ یہ ٹرم لون ہے اور اس کی ادائیگی 15سال کے اندر کی جانی ہے ۔اس میں ایک سال کے لئے طلبہ کو قرض لوٹانے میں راحت دینے کا بھی التزام کیاگیاہے ۔انہوں نے کہاکہ حکومت نے بینکوں کو تعلیم میں غیر ہراساں پالیسی اختیار کرنے کے لئے کہا ہے ۔وزیر نے کہاکہ اس قرض کو معاف کرنے کا حکومت کا کوئی منصوبہ نہیں ہے ۔یہ قرض سبھی ضرورت مند طلبہ کے لئے ہے ۔اس قرض سے متعلق معلومات حاصل کرنے کے لئے ودیا لکشمی پورٹل تیار کیاگیاہے ،جس میں ساری معلومات دی گئی ہے ۔پچھلے تین برس کے دوران بقایا ایجوکیشن لون ستمبر تک 75450.68کروڑ روپے ہوگیا ہے ۔