حیدرآباد کو آلودگی سے پاک بنانے صنعتوں کی منتقلی، اراضی پالیسی پر تنقید غیر ضروری
حیدرآباد 27 نومبر (سیاست نیوز) وزیر آبپاشی اتم کمار ریڈی نے الزام عائد کیاکہ حیدرآباد کو آلودگی سے پاک بنانے کیلئے صنعتی اداروں کی منتقلی سے متعلق پالیسی کو غیر ضروری نشانہ بنانے کی کوشش کی جارہی ہے۔ گاندھی بھون میں میڈیا سے بات چیت کرتے ہوئے اتم کمار ریڈی نے کہاکہ آؤٹر رنگ روڈ کے حدود میں موجود صنعتوں کو آؤٹر رنگ روڈ کے بیرونی حصہ میں منتقل کرنے کا فیصلہ کیا گیا ہے۔ صنعتی اراضی کی ملٹی زون میں منتقلی کے سلسلہ میں حکومت نے پالیسی تیار کی جو ریاست کے عین مفاد میں ہے۔ اُنھوں نے کہاکہ اراضی پالیسی کو بی آر ایس قائدین اراضی اسکام قرار دینے کی کوشش کررہے ہیں۔ اُنھوں نے کہاکہ تمام اسٹیک ہولڈرس سے مشاورت کے بعد اراضی پالیسی تیار کی گئی اور بی آر ایس قائدین جان بوجھ کر حکومت کو نشانہ بنارہے ہیں۔ پالیسی کے نتیجہ میں حکومت کو آمدنی حاصل ہوگی جو فلاحی اور ترقیاتی اسکیمات پر خرچ کی جائے گی۔ وزیر نے کہاکہ حکومت کے ہر فیصلہ کو تنقید کا نشانہ بنانا بی آر ایس کی عادت بن چکی ہے۔ نئے تھرمل پاور پراجکٹ کے قیام کے فیصلہ کو بھی تنقید کا نشانہ بنایا جارہا ہے۔ آندھراپردیش تنظیم جدید قانون کے تحت نیا برقی پراجکٹ تعمیر کیا جائے گا۔ سابق بی آر ایس حکومت نے 10 برسوں میں تلنگانہ کو برقی کے شعبہ میں خود مکتفی بنانے پر توجہ نہیں دی۔ این ٹی پی سی کے تحت نیا برقی پراجکٹ قائم کیا جائے گا جس کے نتیجہ میں چھتیس گڑھ سے برقی خریدی کی ضرورت نہیں پڑے گی۔ ریاستی کابینہ نے راماگنڈم، پالونچہ اور مکتھل میں نئے تھرمل پاور پراجکٹس کے قیام کا فیصلہ کیا ہے۔ اُنھوں نے کہاکہ بی آر ایس کے دور حکومت میں اراضی منتقلی میں جو دھاندلیاں کی گئیں اُن کا جلد ہی انکشاف کیا جائے گا۔ اُنھوں نے سوال کیاکہ حیدرآباد کو آلودگی سے پاک شہر بنانے پر بی آر ایس کو کیا اعتراض ہے۔ بی آر ایس دور حکومت میں بھی اِس پالیسی پر غور کیا گیا تھا لیکن کوئی فیصلہ نہیں ہوا۔ اُنھوں نے کہاکہ حیدرآباد کو دہلی کی طرح آلودگی سے بچانے کے لئے حکومت صنعتوں کو آؤٹر رنگ روڈ کے باہر منتقل کرنا چاہتی ہے۔ نئی صنعتی پالیسی سے ریاست کو آمدنی حاصل ہوگی۔ معاشی دشواریوں کے باوجود حکومت فلاحی اور ترقیاتی اسکیمات پر عمل پیرا ہے۔ بی آر ایس برسر اقتدار آنے پر پالیسی میں تبدیلی کے اعلان پر تبصرہ کرتے ہوئے اتم کمار ریڈی نے کہاکہ تلنگانہ میں بی آر ایس کے دوبارہ برسر اقتدار آنے کا سوال ہی پیدا نہیں ہوتا۔ گزشتہ 10 برسوں میں جو اسکیامس کئے گئے اُن کی تفصیلات جلد ہی منظر عام پر آئے گی۔1
