سرینگر : صدر پی ڈی پی اور سابق وزیر اعلیٰ محبوبہ مفتی کا کہنا ہے کہ حکومت ان کی پارٹی سے خوفزدہ ہے ۔ انہوں نے ساتھ ہی کہا کہ ان کی پارٹی جموں و کشمیر کے لوگوں کے حقوق کے لئے جدو جہد کررہی ہے جس سے حکومت ڈرتی ہے ۔پارٹی دفتر پر معروف تاجر زوہیب یوسف میر کی آج پی ڈی پی میں شمولیت کے موقع پر میڈیا سے بات چیت میں محبوبہ مفتی نے کہا کہ دوسری جماعتوں کو یہاں جلسے جلوس کرنے کی اجازت ہے لیکن پی ڈی پی کو اپنے بانی مفتی محمد سعید کے مزار پر فاتحہ پڑھنے کی بھی اجازت نہیں ہے ۔انھوں نے کہاکہ شاید یہ (حکومت) ہم سے خوفزدہ ہیں کیو نکہ ہم سچ بولتے ہیں اور جموں وکشمیر کے لوگوں کے لئے ایک جدو جہد کا حصہ ہیں ۔محبوبہ مفتی نے کہا کہ نہ صرف اپنی کھوئی ہوئی شناخت کو بحال کرناہمارا ایجنڈا ہے بلکہ ریاست کو خون خرابے سے محفوظ رکھنا بھی ہمارا اولین مقصد ہے۔ خون خرابے سے یہاں ہزاروں لوگوں نے اپنی جانیں گنوائیں، ہزاروں بچے یتیم ہوگئے اور ہزاروں کی تعداد میں خواتین بیوہ ہوگئیں۔ محبوبہ مفتی نے کہا کہ ہم ہمارے مقصد میں کامیابی تک جدوجہد کرتے رہیں گے ۔جن حالات سے پی ڈی پی گذر رہی ہے ایسے حالات میں پی ڈی پی میں شمولیت اختیار کرنا مشکل بات ہے۔ انھوں نے کہا کہ تعلیم یافتہ نوجوان ہماری پارٹی میں آ رہے ہیں جس سے ہماری حوصلہ افزائی ہو رہی ہے ۔