حیدرآباد۔26 اگست (یواین آئی) حیدرآباد سمیت ریاست کے بیشتر اضلاع میں جمعرات کی صبح کی اولین ساعتوں میں بارش ہوئی۔حیدرآباد کے پرانا شہر کے ساتھ نئے شہر سکندرآباد، ایل بی نگر، اُپل،بنجاراہلز،جوبلی ہلز،کوٹھی، لکڑی کا پُل،ملکاجگری، بیگم پیٹ اور دیگر علاقوں میں شدید بارش ہوئی۔بارش کا آغاز صبح تقریبا پانچ بجے ہوا جو تقریبا ایک گھنٹہ تک جاری رہی۔بارش کے نتیجہ میں کئی سڑکوں پر بڑے پیمانہ پرپانی جمع ہوگیا۔نشیبی علاقوں میں بھی پانی جمع ہونے کی اطلاعات ہیں۔ راجندرنگر میں تین سنٹی میٹر اور بنڈلہ گوڑہ میں دو سنٹی میٹر بارش ہوئی ۔ حیدرآباد کے ساتھ ساتھ شمالی تلنگانہ کے کئی علاقوں میں بھی بارش ہوئی۔ ضلع نظام آباد کوٹگیر میں 14سنٹی میٹربارش ہوئی۔ہنمکنڈہ،کاماریڈی اور کھمم میں 8سنٹی میٹر بارش ریکارڈ کی گئی۔سرسلہ، سنگاریڈی میں 9سنٹی میٹر بارش ہوئی ۔بارش کے نتیجہ میں سڑکوں پر پانی جمع ہونے سے صبح کے اوقات میں دفاتر جانے والوں کو مشکلات کا سامنا کرناپڑا ۔ جی ایچ ایم سی عملہ نے کئی مقامات پر پانی کی نکاسی کی ۔ کئی مقامات پر برقی سربراہی میں خلل کی اطلاعات ہیں۔محکمہ موسمیات نے کل بھی ریاست کے کئی حصوں میں بارش کی پیش گوئی کی ہے ۔
