ویسٹ انڈیز کے سابق عظیم فاسٹ بولر امبروزکی خدمات حاصل کی جائیں گی : اظہر الدین
حیدرآباد ۔ 24ڈسمبر ( سیاست ڈاٹ کام ) حالیہ دنوں میں حیدرآباد کی سینئر کرکٹ ٹیم کے ناقص مظاہروں کے بعد حیدرآباد کرکٹ اسوسی ایشن کے صدر محمد اظہر الدین نے فیصلہ کیا ہے کہ وہ ویسٹ انڈیز کے لیجنڈری فاسٹ بولر کورٹلی امبروز کی خدمات حاصل کریں گے ۔ میڈیا نمائندوں سے اظہار خیال کرتے ہوئے جمخانہ گراؤنڈ سکندرآباد پر اظہر الدین جو یہاں انڈر 23اور انڈر 19ٹیم کے ساتھ موجود تھے ، نے کہاکہ وہ ایمبروز کے ساتھ تبادلہ خیال میں مصروف تھے اور وہ حیدرآبادی نوجوان کھلاڑیوں کو اپنے تجربات سے استفادہ کا موقع دیں گے ۔ امید کی جارہی ہے کہ امبروز حیدرآبادی رانجی ٹیم کیلئے بحیثیت کرکٹ مشیر اپنی خدمات انجام دیں گے ۔ اظہر الدین نے کہا کہ یہ یقینی ہے کہ ایمبروز عنقریب حیدرآبادی ٹیم میں شامل ہوں گے اور یہ ضروری ہے کہ ایمبروز جیسے لیجنڈری فاسٹ بولر کے تجربات سے حیدرآبادی نوجوان کھلاڑیوں کو سیکھنے کا موقع فراہم کیا جائے ۔ اظہر الدین نے کہا کہ ایمبروز اپنے تجربات کھلاڑیوں اور کوچس کے ساتھ باٹیں گے ۔ اظہر الدین کے بموجب حیدرآبادی ٹیم کے مظاہروں میں بہتری کیلئے اہم اقدامات کئے جانے ضروری ہے ۔ سابق ہندوستانی کپتان اور ایچ سی اے کے صدر اظہر الدین نے کہا کہ حیدرآباد میں صلاحیتوں کی کمی نہیں ہے لیکن ہمارے کھلاڑیوں کو اپنی صلاحیتوں کا مظاہرہ کرنے کیلئے صحیح رہنمائی کی ضرورت ہے ۔