حیدرآباد 23 اپریل (یو این آئی) ملک کے پہلے موبائل وائرلوجی لیاب کا آغازمرکزی وزیرراج ناتھ سنگھ نے آن لائن کیا۔مرکزی وزیرکشن ریڈی جن کا تعلق حیدرآباد سے ہے کے علاوہ تلنگانہ کے وزیرانفارمیشن ٹکنالوجی کے تارک راما راو نے بھی ای ایس آئی سی،صنعت نگر حیدرآباد میں منعقدہ اس پروگرام میں شرکت کی۔اس لیاب کو ڈی آرڈی او نے آئی کلین اینڈ آئی سیف کے اشتراک سے تیار کیا ہے ۔اس لیاب میں ٹیکہ کی تیاری کے لئے کام کیاجائے گا،کورونا وائرس کی طبی جانچ کی جائے گی۔اس موقع پر وزیر تارک راما راو نے کہاکہ حکومت نے 20دنوں میں 1500بستروں والے تلنگانہ انسٹی ٹیوٹ آف میڈیکل سائنسس اینڈ ریسرچ کا قیام عمل میں لایا ہے ۔حکومت نے اس وائرس کی روک تھام کے لئے تین سطحی حکمت عملی تیار کی ہے ۔انہوں نے کہاکہ حکومت نے کورونا وائرس کے شکار افراد کے علاج کے لئے 8ہاسپٹلس قائم کئے ۔مرکزی رہنمایانہ خطوط پر ریاست میں عمل کیاجارہا ہے ۔انہوں نے عوام پر زوردیا کہ وہ کورونا وائرس کو پھیلنے سے روکنے کے لئے قواعد پرعمل کریں۔انہوں نے کہا کہ لاک ڈاون کے دنوں میں ریاست میں 88لاکھ خاندانوں میں چاول اور نقد رقم کی تقسیم کا کام کیاگیا ہے ۔