ڈپٹی چیف منسٹر بھٹی وکرمارکا اور وزیر ڈی سریدھر بابو کا خطاب
حیدرآباد ۔ 29 ۔ اکتوبر (سیاست نیوز) ڈپٹی چیف منسٹر بھٹی وکرمارکا اور وزیر آئی ٹی و صنعت سریدھر بابو نے آج حیدرآباد میں انٹرنیشنل برانڈ میک ڈونلڈ کا گلوبل کیپبلٹی سنٹر کا افتتاح کیا۔ اس موقع پر خطاب کرتے ہوئے دونوں وزراء نے کہا کہ حیدرآباد سرمایہ کاروں کے لئے مرکز میں تبدیل ہورہا ہے ۔ تلنگانہ کی صنعتی پالیسی اور ساتھ ہی حکومت کے تعاون اور خوشگوار ماحول کی وجہ سے قومی اور بین الاقوامی ادارے تلنگانہ میں اپنی سرمایہ کاری کو ترجیح دے رہے ہیں جس سے ریاست میں بیروزگار نوجوانوں کو روزگار فراہم کرنے میں بڑی مدد مل رہی ہے ۔ ڈپٹی چیف منسٹر نے کہا کہ تلنگانہ حکومت کی پالیسیوں سے متاثر ہوکر میک ڈونلڈ نے اپنی گلوبل آفس کے لئے حیدرآباد کا انتخاب کیا ہے۔ چیف منسٹر ریونت ریڈی ریاست تلنگانہ کو ملک بھر میں مثالی ریاست کی طرز پر ترقی دینے کیلئے خصوصی حکمت عملی تیار کرتے ہوئے کام کر رہے ہیں جس میں اولین ترجیح لاء اینڈ آرڈر کو دی جارہی ہے جس سے متاثر ہوکر نیشنل اور ملٹی نیشنل کمپنیاں حیدرآباد کا رخ کر رہی ہیں۔ ایک طرف ریاست میں صنعتوں کا پھیلاؤ ہورہا ہے تو دوسری جانب نوجوانوں کو بڑے پیمانہ پر روزگار حاصل ہورہا ہے ۔ ملک کے پہلے وزیراعظم نہرو سے ڈاکٹر منموہن سنگھ تک کانگریس کے تمام وزرائے اعظم نے ملک کی ترقی ، معیشت کو فروغ اور نوجوانوں کو روزگار فراہم کرنے کیلئے بڑے پیمانہ پر عملی اقدامات کئے ۔ ریونت ریڈی حکومت بھی انہی کے نقش قدم پر کام کرتے ہوئے ریاست کو ایک فلاحی اسٹیٹ میں تبدیل کرنے کیلئے کام کر رہی ہے۔ چیف منسٹر نے اپنے بیرونی ممالک کے دورہ میں مختلف کمپنیوں کے سی اوز اور ان کے نمائندوں سے ملاقات کرتے ہوئے تلنگانہ اور حیدرآباد میں سرمایہ کاری کرنے کی کامیابی ترغیب دی ہے جس کے بدولت بڑے بڑے کمپنیاں حیدرآباد کا رخ کر رہی ہیں۔ ریاستی وزیر آئی ٹی و صنعت ڈی سریدھر بابو نے کہا کہ آئی ٹی و صنعت کے شعبہ میں تلنگانہ کی مختصر عرصہ میں جو کامیابی ہوئی ہے، وہ سارے ملک کیلئے مثالی ہے۔ میک ڈونلڈ کا گلوبل آفس کا حیدرآباد میں قیام اس کی زندہ مثال ہے۔ انہوں نے کہا کہ 1940 میں میک ڈونلڈ کا قیام عمل میں آیا تھا جو آج ساری دنیا میں پھیل چکا ہے۔ انہوں نے کہا کہ اس طرح کے مزید کمپنیاں حیدرآباد میں اپنے آفسس قائم کرنے کیلئے دلچسپی کا اظہار کر رہے ہیں۔ کانگریس حکومت تلنگانہ میں کمپنیاں قائم کرنے والے کو ہر ممکن مدد کریں گی۔2
