عوام کو شدید گرمی سے راحت ۔ سڑکوں پر پانی جمع ہوگیا ۔ کچھ درخت بھی اکھڑ گئے
حیدرآباد16مئی (یواین آئی)شہر حیدرآباد کے کئی علاقوں میں ہفتہ کی دوپہر اچانک طوفانی ہواوں کے ساتھ بارش ہوئی جس کے نتیجہ میں لوگوں کو گرمی سے راحت نصیب ہوئی اور درجہ حرارت میں کمی واقع ہوئی۔ بارش کے سبب سڑکوں پرپانی جمع ہوگیا۔شہر کے خیریت آباد، سوماجی گوڑہ ،پنجہ گٹہ، کوٹھی، بیگم بازار، عابڈز، حمایت نگر ، بشیرباغ، نامپلی، عنبرپیٹ، کاچی گوڑہ، نلہ کنٹہ، مہدی پٹنم، لنگرحوض ، چمپاپیٹ، سرورنگر، ملک پیٹ، کوتہ پیٹ اور پرانا شہر حیدرآباد کے کئی علاقوں میں بارش ہوئی۔صبح میں شہر میں شدید گرمی دیکھی گئی تھی تاہم دوپہر میں اچانک گرج وچمک کے ساتھ کچھ دیر کیلئے بارش ہوئی۔اس بے موسمی بارش کے سبب گذشتہ چند ہفتوں سے شدید گرمی کا سامنا کرنے والے شہریوں کو قدرے راحت نصیب ہوئی۔حیدرآباد کے علاوہ میڑچل،رنگاریڈی،ناگرکرنول اضلاع میں بھی بارش ہوئی۔ حیدرآباد کے محکمہ موسمیات کے مرکز نے کہا ہے کہ حیدرآباد میں طوفان کے کوئی اثرات نہیں ہیں۔بارش کے سبب بعض علاقوں میں درختوں کے بھی سڑکوں پر گرنے کی اطلاعات ملی ہیں جس سے گاڑیوں کی آمد ورفت متاثر ہوئی۔اطلاع ملتے ہی گریٹرحیدرآباد میونسپل کارپوریشن(جی ایچ ایم سی)کے اہلکاروہاں پہنچے جنہوں نے درختوں کو سڑکوں سے ہٹاکر ٹریفک کیلئے سڑک کو بحال کرنے کا کام انجام دیا۔بعض مقامات پر سڑکیں جھیل کامنظر پیش کررہی تھیں۔اسی دوران محکمہ موسمیات نے کہا ہے کہ شمالی ساحلی اے پی،یانم،رائلسیما کے بعض مقامات پر اتوار سے آئندہ چار دنوں تک گرج وچمک کے ساتھ بارش اور 40 تا 50 کیلومیٹر فی گھنٹہ کی رفتار سے ہوائیں چلیں گی۔ محکمہ نے کہا کہ آئندہ 24گھنٹوں کے دوران تلنگانہ کے بعض مقامات پر بارش کا امکان ہے ۔آئندہ 48گھنٹوں میں تلنگانہ،رائلسیما میں بعض مقامات پر درجہ حرارت کے 41 تا 43 ڈگری کے درمیان ہونے کا امکان ہے ۔اعظم ترین درجہ حرارت 42.8 ڈگری سلسیس ضلع میدک میں درج کیاگیا جبکہ 41.7ڈگری سلسیس اے پی کے کرنول میں درج کیاگیا۔