ذائقوں کے عالمی مقابلہ میں حیدرآبادی بریانی فاتح ، لکھنو اور کولکتہ پیچھے رہ گئے
حیدرآباد : 28 نومبر ( سیاست نیوز) حیدرآباد کی ثقافت ، ذائقے اور صدیوں پر محیط آصف جاہی ورثے کی پہچان ’’ حیدرآبادی بریانی ‘‘ نے ایک بار پھر عالمی سطح پر اپنی برتری ثابت کردی ہے ۔ 400 سالہ نظامی تہذیب ، فارسی و ترکی اثرات اور جنوبی ہند کے منفرد مصالحوں کے امتزاج سے تیار ہونے والی یہ ڈش صرف ایک کھانا نہیں بلکہ ایک روایت ، ایک جذباتی وابستگی اور حیدرآبادی تہذیب کی روح ہے ۔ شادی ہو یا سالگرہ ، دعوت ہو یا عید و تہوار حیدرآباد میں کوئی جشن بریانی کے بغیر مکمل نہیں سمجھا جاتا ہے ۔ معروف عالمی فوڈ اینڈ ٹریول گائیڈ ’’ ٹیسٹ ابلس‘‘ نے 2025 دنیا کے بہترین چاول کے پکوان کی فہرست جاری کی جس میں حیدرآبادی بریانی نے دنیا بھر کے سینکڑوں پکوانوں کو پیچھے چھوڑتے ہوئے ٹاپ 10 میں شاندار مقام حاصل کیا ہے ۔ یہ ہندوستان کی واحد ڈش ہے جو ٹاپ 50 میں شامل ہوئی ہے جو خود میں ایک تاریخی کامیابی ہے ۔ اس عالمی مقابلہ میں جاپان کے نیگٹوروڈون ، سوشی اور کیسن ڈن نے پہلی تین پوزیشن حاصل کی جبکہ ایران کی چیرشک پولو بھی فہرست میں شامل رہی ، تاہم سب سے زیادہ نمایاں مقام حیدرآباد ی بریانی کی رہی جس نے لکھنو اودھی بریانی ، کولکتہ بریانی اور کشمیری رائس جیسے برصغیر کے بڑے ذائقہ دار پکوانوں کو بھی پیچھے چھوڑ دیا ۔ ماہرین کے مطابق حیدرآباد بریانی کی عالمی سطح پر مقبولیت کی سب سے بڑی وجہ باسمتی چاول ، زعفرانی مصالحہ جات ، مخصوص دم پکا و طریقہ اور مسالوں کے توازن امتزاج میں بھی ہے جو دنیا بھر کے کھانوں کے شائقین کو اپنی دیوانہ بنادیتی ہے ۔ یہ درجہ بندی شیرشیقون، فوڈ ناقدین ، فوڈ رائٹرز اور دنیا بھر کے لاکھوں مسافروں کی آراء اور تجربات کی بنیاد پر مرتب کی گئی ہے ۔ یہ اعزاز حیدرآباد کے باشندوں کیلئے فخر کا لمحہ ہے کہ ان کے شہر کی شناخت ایک بار پھر دنیا میں بلند ہوئی ۔ حیدرآباد ایک بات ثابت کرچکا ہے کہ یہ نہ صرف ٹکنالوجی کا مرکز ہے بلکہ دنیا کا اصل ذائقوں کا دارالحکومت بھی ہے ۔2
