ٹوکیو ۔ ٹوکیو پیراولمپکس میں مردوں کے ڈسکس تھرو مقابلے میں حیدر علی نے پاکستان کے لئے پہلا گولڈ میڈل جیت کر تاریخ رقم کردی۔حیدر علی نے چھ میں سے تیسری مرتبہ میں 47.84 میٹرکی تھروکی جبکہ پانچویں مرتبہ میں 55.26 کی تھرو کے ساتھ گولڈ میڈل جیتا۔یہ ان کی اب تک کی سب سے بڑی تھرو ہے۔مقابلے میں یوکرین کے مائیکولا زابنیاک نے 52.43 میٹر کی تھرو کے ساتھ سلور جبکہ برازیل کے جو وِکٹر ٹیکزیرا ڈی سوزا نے 51.86 میٹرکی تھرو کے ساتھ برونز میڈل جیتا۔حیدر علی ٹوکیو پیراولمپکس میں گولڈ میڈل جیتنے والے پہلے پاکستانی ہیں۔انہوں نے اس سے قبل بھی پاکستان کے لیے دو پیراولمپکس میڈل جیت رکھے ہیں۔حیدر علی نے لانگ جمپ مقابلوں میں 2008 میں سلور اور 2016 میں برونز جیتا ہے۔وہ میڈل کی دوڑ میں پاکستان کی آخری امید تھے کیونکہ دوسری پاکستانی ایتھلیٹ انیلا عزت بیگ نااہل قرار دے دی گئی تھیں۔وفاقی وزیر اطلاعات و نشریات فواد چوہدری نے سماجی رابطے کی ویب سائٹ ٹوئٹر پرحیدر علی کو مبارکباد دیتے ہوئے کہا کہ ہمیں آپ پر فخر ہے۔
