سرینگر: حیدریہ اسپورٹس فٹبال کلب بنگلور میں 4 اکتوبر سے کھیلی جانے والی سکنڈ ڈیویژن لیگ میں اس سال جموں و کشمیر کی نمائندگی کرے گا۔ حیدریہ اسپورٹس فٹبال کلب جموں و کشمیر کا واحد کلب ہے جس نے اس لیگ کے لئے کوالیفائی کیا ہے ۔ کلب کے منیجر منیر حسین غازی نے بتایا کہ ہم چاہتے ہیں کہ ہمارے کلب میں زیادہ سے زیادہ تعداد میں کھلاڑی شامل ہو جائیں تاکہ وہ قومی سطح پر اپنی صلاحیتوں کا لوہا منوا سکیں۔ انہوں نے کہا کہ ہم یہ کلب گذشتہ زائد از سات برسوں سے چلا رہے ہیں مگر ابھی تک متعلقہ محکمہ ہماری کوئی مدد نہیں کر رہا ہے۔ انھوں نے کہا کہ حیدریہ اسپورٹس فٹبال کلب ان دس کلبوں میں شامل ہے جس کو اس سال یہ لیگ کھیلنے کے لئے منتخب کیا گیا ہے ۔ منیجر نے کہا کہ ہم یونین ٹریٹری کے کھلاڑیوں کے لئے ٹی آر سی گرائونڈ میں اوپن ٹرائل کر رہے ہیں کوئی بھی کھلاڑی آ کر اس میں حصہ لے سکتا ہے ۔ انہوں نے حکومت سے اپیل کی کہ وہ ان کی بھرپور مدد کریں تاکہ وہ اس مشن کو نئی بلندیوں تک پہنچانے میں کامیاب ہو سکیں۔
