کیف : ایک خاتون کو صدر ولادیمیر زیلنسکی کے قتل کی سازش کے الزام میں گرفتار کیا گیا ہے۔یوکرین سکیورٹی سرویس کے مطابق قتل کی یہ سازش روس کی جانب سے تیار کی گئی تھی اس خاتون نے جون میں سیلاب سے متاثرہ علاقے ’مائکولیو‘ کے دورے سے قبل صدر زیلنسکی کے سفر کی تفصیلات جاننے کی کوشش کی تھی۔یوکرین باقاعدگی سے ان مقامی باشندوں پر الزام لگاتا رہا ہے جو روس کی حمایت کرتے ہیں اور مبینہ طور پر ماسکو کی فوج کو مدد کی غرض سے معلومات فراہم کرتے ہیں۔صدر زیلینسکی نے تصدیق کی کہ انھیں خاتون کی گرفتاری کے بارے میں مطلع کیا گیا ہے۔ انھوں نے کہا کہ یوکرین کی سکیورٹی سروس ’ایس بی یو‘ کے سربراہ نے انھیں ’غداروں کے خلاف لڑائی‘ کے بارے میں اپ ڈیٹ دی تھی۔روس نے اس گرفتاری پر ابھی تک کوئی تبصرہ نہیں کیا ہے۔ایس بی یو نے ایک بیان میں کہا کہ خاتون کو اس وقت ’رنگے ہاتھوں‘ گرفتار کیا گیا جب وہ روسیوں کو خفیہ معلومات پہنچانے کی کوشش کر رہی تھیں۔انھوں نے الزام لگایا کہ دورے سے پہلے اس خاتون نے جنوبی میکولیو کے علاقے میں صدر زیلینسکی کے منصوبوں کا پتہ لگانے کیلئے انٹیلیجنس جمع کرنے کی کوشش کی۔
