میڈرڈ۔27 مارچ (سیاست ڈاٹ کام) اسپین کی خاتون فٹبال ریفریز نے سیٹی چھوڑ کر مریضوں کی تیمار داری کیلیے ماسک پہن لیا۔ اراگا رٹزے لالیگا میچز میں خدمات سر انجام دیتی رہی ہیں،وہ نرسنگ کا ڈپلومہ بھی رکھتی ہیں لہذا انہوں نے اب اپنی خدمات کا رخ بدل دیا ہے ۔ کورونا وائرس کی وبا پھیلنے پر اراگا ماسک پہن کر مریضوں کی دیکھ بھال کرنے لگیں۔ انہوں نے کہا کہ میرا کام شک میں آنے والے مریضوں کا ابتدائی جائزہ لے کر ڈاکٹرز کو مطلع کرنا ہے۔ خطرہ بہت زیادہ ہے لیکن میں ایک جذبے سے کام کررہی ہوں۔اراگا رٹزے نے کہا کہ لاک ڈاون کی وجہ سے گھروں میں موجود لوگ روزانہ رات 8 بجے چھتوں اور بالکونیوں سے میڈیکل ورکرز کی ہمت کو سلام پیش کرتے ہیں تو میرا حوصلہ بڑھ جاتا ہے۔ ایک اور اسسٹنٹ ریفری جوڈی دواخانہ میں اینستھیزیا ماہر کے طور پر سرگرم ہیں، انھوں نے کہا کہ ہم نے امید کا دامن نہیں چھوڑا، ایک دن آئے گا کہ میں میچ میں سیٹی بجا رہی ہوں گی۔
