بوگوٹا : کولمبیا کے بوگوٹا ہوائی اڈہ پر خاتون کے سامان سے حیران کن طور پر 3 کروڑ 60 لاکھ مالیت کے 130 زہریلے مینڈک برآمد ہوئے ، پولیس نے خاتون کواسمگلنگ کے الزام میں گرفتار کرلیا۔غیر ملکی خبر رساں ادارے کی رپورٹ کے مطابق 37 سالہ برازیلین خاتون (جن کا نام ظاہر نہیں کیا گیا)، ان مینڈک کو برازیل اسمگل کرنے کی کوشش کررہی تھیں، وہ براستہ پاناما ساؤ پالو جا رہیں تھیں، جب انہیں یونیفارم ایئرپورٹ پولیس نے روکا۔پولیس نے جب ان کے سوٹ کیس کی تلاشی لی تو افسران کا کہنا ہے کہ انہیں 130 مینڈک ملے، جنہیں چھوٹے کنستروں میں انتہائی نامناسب حالات میں چھپا کر رکھا گیا تھا جس کی وجہ سے وہ پانی کی کمی کا شکار تھے۔پولیس کا کہنا تھا کہ بلیک مارکیٹ میں ایک مینڈک کی قیمت ایک ہزار ڈالرز ہے، یہ مینڈک انسانی انگوٹھے سے بھی چھوٹے ہوتے ہیںجو وسطی اور جنوبی امریکہ کے دیگر ممالک کے جنگلات میں بھی پائے جاتے ہیں۔