ڈھاکہ : بنگلہ دیش نیشنل پارٹی ( بی این پی) کی سربراہ اور سابق وزیر خالدہ ضیا کی سزا معطلی کی مدت تیسری بار چھ ماہ تک بڑھائی جائے گی ۔ میڈیا رپورٹس کے مطابق وزارت قانون نے خالدہ ضیاء کے حق میں اپنی رائے وزارت داخلہ کو بھیج دی ہے ۔ وزیر قانون انیس الحق نے کہا کہ ان کی سزا کی معطلی کی مدت میں مزید چھ ماہ کی توسیع کی سفارش کی گئی ہے اور جہاں تک وہ جانتے ہیں وزارت داخلہ نے اس کی منظوری دے دی ہے ۔ گذشتہ ہفتہ خالدہ ضیاء کے ایل خانہ وزارت داخلہ سے کورونا کی پیچیدگیوں اور اس کے علاج کے حالات کی بنیاد پر ان کی جیل کی سزا کی معطلی میں توسیع کرنے کی اپیل کی تھی ۔ وزارت داخلہ نے یہ درخواست قانونی رائے کیلئے وزارت قانون کو بھیج دی تھی ۔ واضح رہے کہ 10 اور 24 اپریل کو دو بار خالدہ کی کورونا ٹسٹ رپورٹ مثبت آئی تھی ۔ وہ تقریباً دو ماہ تک اسپتال میں رہنے کے بعد 19جون کو گھر واپس آئی تھی ۔ حکومت نے بیرون ملک نہیں بلکہ گھر پر علاج کروانے کی شرط پر اس کی سزا کو چھ ماہ کیلئے دو مرتبہ معطل کردیا تھا ۔
