گرفتاری کے وقت امرت پال کے سر پر پگڑی، کمر میں کرپان موجود،آسام کی جیل منتقل
نئی دہلی : پولیس نے خالصتان تحریک کے سکھ رہنما امرت پال سنگھ کو گرفتار کرلیاگیا۔پنجاب پولیس کے مطابق امرت پال سنگھ کو پنجاب کے ضلع موگا سے گرفتارکیاگیا ہے۔ پنجاب پولیس ایک ماہ سے زیادہ عرصہ سے امرت پال سنگھ کو تلاش کررہی تھی جبکہ گرفتاری کے موقع پر پولیس کی جانب سے شہریوں سے پر امن رہنے کی اپیل کی گئی ہے۔امرت پال سنگھ نے گرفتاری سے قبل روڈوال گوردوارہ میں ایک خطبہ بھی دیا تھا جس میں وہ کہہ رہا تھا کہ یہ انتہا نہیں بلکہ آغاز ہے۔پنجاب پولیس نے امرت پال سنگھ کو 36 دن بعد گرفتارکیا ہے۔ پولیس نے امرت پال کو موگا کے روڈوال گوردوارہ سے گرفتار کیا ہے۔ میڈیا کے مطابق اس کی گرفتاری کے وقت کی تصویر منظر عام پر آئی ہے، جس میں وہ سر پر پگڑی، کمر میں کرپان اور ننگے پاؤں یعنی مکمل طور پر نہنگ کا لباس پہنے ہوئے نظر آ رہا ہے ۔پنجاب پولیس نے ٹویٹ کیا کہ امرت پال سنگھ کو موگا سے گرفتار کیا گیا ہے۔ اس کے ساتھ ہی پولیس نے لوگوں سے اپیل کی ہے کہ وہ کسی بھی قسم کی افواہوں پر دھیان نہ دیں اور امن و امان برقرار رکھیں۔ اس سے پہلے بتایا گیا تھا کہ امرت پال نے موگا کے رودیوال گوردوارہ میں خودسپردگی کی ہے۔ میڈیا میں شائع خبر کے مطابق امرت پال سنگھ نے گرفتاری سے قبل روڈوال گوردوارہ میں خطاب بھی کیاتھا ۔ اس نے گرودوارے میں تبلیغ کے بعد پولیس کے سامنے خودسپردگی کی۔ بتایا جا رہا ہے کہ امرت پال ہفتہ کی شام سے گرودوارے میں چھپا ہوا تھا۔ جس کی اطلاع سابق جتھیدار جسبیر سنگھ کی جانب سے پولیس کو دی گئی۔ امرت پال کو پولیس نے اتوار کی صبح 7 بجے اپنی تحویل میں لے لیا ہے۔ اسے امرتسر لایا گیا ہے اور خبر گشت کر رہی ہے کہ وہاں سے اسے بٹھنڈہ ہوائی اڈے سے پرواز کے ذریعے آسام کی ڈبرو گڑھ جیل بھیج دیا گیا ہے۔