دونوں وزرائے اعظم کے درمیان تجارت کی بجائے خالصتان کا موضوع ہی حاوی رہا
لندن : ہندوستان میں سکھوں کے علیحدہ وطن کے قیام کے لیے لندن میں ہونے والے ریفرنڈم نے نریندر مودی کو پریشان کردیا۔اسکاٹ لینڈکے شہرگلاسگو میں ہوئی عالمی موسمیاتی کانفرنس کے موقع پر ہونے والی ملاقات میں مودی برطانوی وزیراعظم بورس جانسن کے سامنے پھٹ پڑے اور برطانیہ میں خالصتان پر ہونے والے ریفرنڈم میں اپنے تحفظات کا اظہار کیا۔دونوں وزرائے اعظم کے درمیان ہوئی ملاقات میں تجارت کے بجائے خالصتان کا موضوع ہی حاوی رہا۔ملاقات میں مودی نے بورس جانسن کے سامنے خالصتان پر ریفرنڈم کا معاملہ اٹھایا جس کے بعد اتفاق ہوا کہ دونوں کے قومی سلامتی کے مشیران اس معاملے پر مل کر مسئلے کی نشاندہی کریں گے۔ہندوستانی سیکرٹری خارجہ نے ایک بیان میں کہا ہیکہ ہندوستان اور برطانیہ کے قومی سلامتی کے مشیر رواں ماہ کے آخر میں ملاقات کریں گے جس میں برطانیہ میں سرگرم خالصتان کے رہنماؤں کے بارے میں بات کی جائیگی۔ہندوستانی سیکرٹری خارجہ کا یہ بیان ایسے وقت سامنے آیا ہے جب 2 روز قبل برطانیہ میں خالصتان کے حوالے سے ریفرنڈم کا انعقاد کیا گیا تھا۔ سکھ قائدین کے مطابق تقریباً 30 ہزار افراد نے ریفرنڈم میں حصہ لیا۔ ان کا کہنا تھاکہ ہندوستانی دباؤ کے باوجود برطانوی حکومت نے ریفرنڈم کی اجازت دی جس پر ان کے شکر گزار ہیں۔