ریاض۔ نیو یارک ٹائمز کے مطابق ایران کے سپریم لیڈر گزشتہ ہفتہ بیمار پڑنے کے بعد مکمل آرام کر رہے ہیں۔عرب نیوز کے مطابق نیویارک ٹائمز نے ذرائع کا حوالہ دیتے ہوئے کہا ہے کہ آیت اللہ علی خامنہ ای نے گذشتہ ہفتہ شدید بیمار ہونے کے بعد تمام ملاقاتیں منسوخ کر دیں۔83 سالہ قائد کی پیٹ میں شدید درد اور تیز بخار میں مبتلا ہونے کے بعد ایک ہوم کلینک میں آنتوں کی سرجری ہوئی تھی۔ میڈیا میں کہا گیا ہے کہ خامنہ ای جنہوں نے 1989 میں سپریم لیڈر کا عہدہ سنبھالا تھا، بیٹھنے سے بھی معذور ہیں اور ڈاکٹروں کا ایک گروپ ان کی دیکھ بھال کر رہا ہے، اگرچہ ان کی صحت گذشتہ ہفتہ بہتر ہوئی تھی۔ایران کے سپریم لیڈر اہم ملکی، علاقائی اور عالمی مسائل بشمول تہران کے نیوکلیر عزائم سے متعلق حتمی فیصلے کرتے ہیں۔امریکی صدر جو بائیڈن کی انتظامیہ ایران کے ساتھ ایک نیوکلیر معاہدہ کو بحال کرنے کی کوشش کر رہی ہے۔خطے میں امریکی اتحادیوں نے بائیڈن سے مطالبہ کیا ہے کہ وہ مشرق وسطیٰ میں تہران کے عدم استحکام کے اقدامات کو ناکام بنانے کے لیے معاہدہ کی تجدید نہ کریں۔
