پیرس ۔ شمالی فرانس میں پانچ اور سات برس عمر کی دو بہنوں نے والدہ کی موت سے بے خبر ان کی نعش کے ساتھ کئی دن گزار دیے۔ فرانسیسی خبر رساں ادارے اے ایف پی نے ریجنل پراسکیوٹر کے حوالے سے بتایا کہ بچیوں کی والدہ اچانک انتقال کر گئی تھیں اور وہ سمجھ رہی تھیں کہ والدہ سو رہی ہیں۔لی مانس شہر کے پراسکیوٹر آفس کے مطابق بچیوں کی اسکول سے لمبی غیر حاضری پر اسکول پرنسپل نے پولیس کو الرٹ کیا۔جب پولیس افسران خاتون کے اپارٹمنٹ پر پہنچے تو بچیوں نے پولیس افسران کو یہ کہہ کر گھر میں داخلے سے روک دیا کہ خاموش ہوجائیں، امی سو رہی ہیں۔ بچیوں کے منع کرنے کے باوجود پولیس افسران نے گھر میں داخل ہونے پر اصرار کیا اور جب وہ اندر گئے تو انہیں بچیوں کی والدہ کی نعش ملی۔ خاتون کی نعش کا پوسٹ ماٹم کرانے پر سامنے آنے والی رپورٹ کے مطابق موت کی وجہ طبعی ہی ہے۔ پولیس کی جانب سے بچیوں کو ہاسپٹل لے جایا گیا جہاں سے انہیں بچوں کی نگہداشت کے ادارے میں داخل کیا گیا ہے۔ کمسن بہنوں کی نفسیاتی دیکھ بھال بھی کی جارہی ہے۔یہ بات واضح نہیں ہوسکی کہ بچیاں کتنے دنوں تک اپارٹمنٹ کے اندر اپنی والدہ کی نعش کے ساتھ رہی ہیں۔معاملے سے متعلق سامنے آنے والی کچھ رپورٹس میں پوسٹ مارٹم رپورٹ کا حوالہ دیتے ہوئے کہا گیا ہے کہ خاتون کے انتقال کو 48 گھنٹے سے زائد کا وقت گزر چکا تھا۔پراسکیوٹر ڈیلفائن ڈیویلی کا کہنا تھا کہ وہ اس کیس میں مجرمانہ محرکات کے امکان کو مسترد کرتے ہیں۔
