دبئی ۔11 جون (سیاست ڈاٹ کام ) متحدہ عرب امارات میں خاندانی تقریب سانحے میں تبدیل ہوگئی۔ تقریب میں شرکت کے بعد بزرگ خاتون کورونا وائرس میں مبتلا ہوکر چل بسیں جب کہ چار بیٹے اور چھ پوتے وائرس کا شکار ہوگئے۔متاثرین میں ایک سات سالہ بچہ بھی شامل ہے۔ تفصیلات کے مطابق بزرگ خاتون کی تجہیز و تکفین اور جنازے میں چاروں بیٹوں میں سے کوئی بھی شرکت نہیں کرسکا۔ سب کے سب دواخانہ میں زیر علاج ہیں۔متوفی خاتون کے بھائی کے بیٹے عبداللہ بن قصیر الدرعی نے کہا کہ 85 سالہ پھوپھی جان کا انتقال کورونا وائرس کی وجہ سے ہوا۔ پھوپھی جان خاندانی تقریب میں شریک ہوئی تھیں جس میں خاندان کے گیارہ افراد موجود تھے۔ شرکا میں چار بیٹے اور 6 پوتے تھے۔ سب کے سب وائرس کی زد میں آگئے۔ الدرعی نے بتایا کہ تقریب میں ایک عزیز شامل ہوا تھا جو حقیقت میں کورونا سے متاثر ہوچکا تھا لیکن ان میں وائرس کی علامات نمودار نہیں ہوئی تھیں۔جتنے لوگ تقریب میں شریک ہوئے سب کے سب وائرس میں مبتلا ہوگئے۔ متاثرہ خاندان کا تعلق ابوظہبی کے شہر العین سے ہے۔سعودی عرب اور متحدہ عرب امارات کے صحت حکام مقامی شہریوں اور مقیم غیرملکیوں کو مسلسل تاکید کررہے ہیں کہ وہ ان دنوں کسی بھی قسم کے اجتماع اور تقریب سے پرہیزکریں۔ ناگزیر تقریبات کے لیے شرکا کی تعداد بھی متعین کردی گئی ہے۔ تقریب کے دوران سماجی فاصلے کی پابندی بھی ضروری قرار دی گئی ہے مگر مقامی شہری اور غیرملکی خاندان احتیاطی تدابیر کو نظر انداز کررہے ہیں۔