امریکہ میں مزید1735 افراد فوت‘ متاثر ین 11 لاکھ 88 ہزار سے متجاوز
واشنگٹن 4مئی (سیاست ڈاٹ کام ) امریکہ کے صدر ڈونلڈ ٹرمپ نے کہا کہ انہیں امید ہے کہ ملک میں اس سال کے اواخر تک کورونا ویکسین تیار کر لی جائے گی ۔ ٹرمپ نے اتوار کو فاکس نیوز ورچیول ٹاؤن ہال میں میٹنگ میں کہا‘‘ مجھے لگتا ہے کہ ہمارے پاس سال کے اواخر تک ایک ویکسین ہوگی ’’ ۔ انہوں نے ماڈیٹر بریٹ بائیر اور مارتھا میکلم کو بتایا‘‘ ہمارے پاس جلد ہی ایک ویکسین ہو گی ’’ ۔ اپریل کے اواخر میں اقوام متحدہ کے سیکریٹری جنرل انٹونیو گوٹریس نے اس بات پر زور دیا تھا کہ کورونا وائرس کی ویکسین تیار ہونے پر دنیا بھر میں ہر شخص کے لئے دستیاب ہونی چاہئے ۔ جان ہاپکنز یونیورسٹی کے کورونا ریسورس سینٹر کے تازہ ترین اعداد و شمار کے مطابق دنیا بھر میں کورونا وائرس کے 3.5 لاکھ سے زائد کیسز ہیں اور ہلاک شدگان کی تعداد 247100 سے زائد ہے اور 10 لاکھ سے زائد افراد صحت یا ب بھی ہو چکے ہیں ۔ امریکہ میں اس وبا کے سب سے زائد 1156900 کیسز سامنے آئے ہیں اور 67450 افراد ہلاک ہو چکے ہیں ۔ انگلینڈ میں آکسفورڈ یونیورسٹی نے گزشتہ ماہ کورونا ویکسین کا تجربہ شروع کیا ۔ روسی وائرلوجی ریسرچ سینٹر ویکیٹر کے سربراہ رینٹ مسیوکوو نے اپریل کے اوائل میں کہا کہ روس میں کورونا وائرس ویکسین ٹیسٹ کا پہلا مرحلہ جون میں شروع ہو گا ۔امریکہ میں کورنا وائرس سے مزید ایک ہزار 735 افراد موت کے منہ میں چلے گئے جس کے بعد امریکہ میں اموات کی تعداد 68 ہزار 598 سے تجاوز کر گئی ہے۔امریکہ میں متاثرہ افراد کی تعداد 11 لاکھ 88 ہزار سے زائد ہو گئی ہے جبکہ صحتیاب ہونے والوں کی تعداد ایک لاکھ 78 ہزار 2 سو سے زائد ہو گئی۔برطانیہ میں کورونا سے مزید 315 افراد کی موت کے بعد اب تک مرنے والوں کی تعداد 28 ہزار 400 سے تجاوز کر گئی جبکہ متاثرہ افراد کی تعداد ایک لاکھ 86 ہزار سے زائد ہے۔سپین میں بھی گزشتہ 24 گھنٹے کے دوران مزید 164 افراد کی اموات کے بعد اب تک ہلاک ہونے والے افراد کی تعداد 25 ہزار 200 سے زائد ہے اور متاثرہ افراد کی تعداد 2 لاکھ 47 ہزار سے بڑھ گئی ہے۔اٹلی میں کورونا وائرس نے مزید 174 افراد کی جان لے لی جہاں اب تک ہونے والی اموات 28 ہزار 884 ہو گئیں۔ اٹلی میں کورونا سے متاثرہ افراد کی تعداد 2 لاکھ 10 ہزار سے زائد ہے۔فرانس میں بھی کورونا نے مزید 135 افراد کی جان لے لی۔ فرانس میں مرنے والوں کی تعداد 24 ہزار 800 سے زائد ہو گئی اور متاثرہ افراد کی تعداد ایک لاکھ 68 ہزار سے تجاوز کر گئی۔جرمنی میں بھی کورونا سے اموات کا سلسلہ جاری ہے اب تک ہونے والی اموات کی تعداد 6 ہزار 840 سے بڑھ گئی ہے جب کہ کورونا کے مریضوں کی تعداد 1 لاکھ 65 ہزار سے تجاوز کر گئی ہے۔ترکی میں بھی کورونا کے وار جاری ہیں۔ گزشتہ 24 گھنٹے کے دوران مزید 61 افراد موت کے منہ میں چلے گئے جس کے بعد اموات کی تعداد 3 ہزار 3 سو سے تجاوز کر گئی۔ایران میں کورونا نے مزید 47 افراد کی جان لے لی جس کے بعد ایران میں کورونا سے اب تک 97 ہزار424 افراد متاثر ہوئے اور ہلاکتوں کی تعداد 6 ہزار دو سو سے بڑھ گئی ہے۔