خرطوم: سوڈان میں ریپڈ فورسز نے بائیولوجیکل لیاب پر حملہ کر دیا ہے ، عالمی ادارہ صحت نے اس حملے کے نتیجہ میں خطرناک وائرس پھیلنے کا خدشہ ظاہر کیا ہے ۔سوڈان میں خانہ جنگی کے دوران جراثیمی ہتھیار کے استعمال کا خطرہ بڑھ گیا ہے ۔ ریپڈ فورسز نے جنگ بندی کی خلاف ورزی کرتے ہوئے خرطوم میں بائیولوجیکل لیاب پردھاوا بولا۔ فورسز نے لیبارٹری پر قبضہ کر کے وہاں تعینات عملہ سے لیاب تک رسائی بھی چھین لی اور بجلی بھی بند کر دی۔ڈبلیو ایچ او کا کہنا ہیکہ لیاب سے خطرناک وائرس پھیلنے کا خدشہ ہے۔ خرطوم میں ڈبلیو ایچ او کی نمائندہ نیما سعید کا کہنا ہیکہ لیاب میں مختلف ویکسین موجود ہیں، جنھیں مخصوص درجہ حرارت پر رکھا جاتا ہے ، اگر فوری بجلی بحال نہ کی گئی تو صورتحال بے قابو ہو جائے گی۔ لیاب سے وائرس کا اخراج روکنے کیلئے ڈاکٹروں نے بین الاقوامی برادری سے فوری مدد کی اپیل کر دی ہے۔ ادھر بی بی سی کے مطابق فوج اور نیم فوجی ریپڈ سپورٹ فورسز کے درمیان لڑائی سے شہر خرطوم تباہی کے دہانے پر پہنچ گیا ہے۔ عالمی ادارہ صحت کا کہنا ہیکہ لیبارٹری میں جراثیمی اور کیمیائی مواد کی وسیع رینج محفوظ ہے۔ عمارت میں خسرہ اور ہیضہ کے پیتھوجینز کے ساتھ دیگر خطرناک مواد بھی موجود ہے۔
