لندن : برطانوی شہزادے پرنس ولیم نے خلا کی سیاحت کی دوڑ میں شامل ہونے والی دنیا کی امیر ترین شخصیات کو تنقید کا نشانہ بناتے ہوئے اپیل کی ہے کہ لوگوں کو پہلے کرہ ارض کی حالت بہتر کرنے پر توجہ دینے کی ضرورت ہے۔شہزادہ ولیم نے یہ بات لندن میں ماحولیات کے ارتھ شاٹ پرائز ایوارڈ کی افتتاحی تقریب سے قبل اتوار کے روز برطانوی براڈ کاسٹنگ ادارے بی بی سی کو ایک انٹرویو میں آب و ہوا کی تبدیلیوں پر تشویش کا اظہار کر تے ہوئے کہی۔ انہوں ماحولیات کے مسائل سے اپنے خاندان کی دیرینہ وابستگی پر بھی گفتگو کی۔واضح رہے کہ ماحولیات سے متعلق سکاٹ لینڈ کے شہر گلاسگو میں اس ماہ کے آخر میں ایک بین الاقوامی کانفرنس ہو رہی ہے، جسے ماحولیات کے بہت سے ماہرین آب و ہوا کی تبدیلی کے خلاف جنگ کا رخ موڑنے کے لئے دنیا کا آخری موقع قرار دے رہے ہیں۔شہزادہ ولیم نے بی بی سی کو انٹرویو میں کہا کہ ہمیں دنیا کے کچھ ایسے بڑے ذہنوں اور دماغوں کی ضرورت ہے جو اس کرہ ارض کی مرمت کی کوششوں پر مرکوز ہوں نہ کہ ایسے مقام کی تلاش میں مصروف رہیں، جہاں مستقبل میں جا کر بسیرا کیا جا سکے ۔
